بەهۆی جینۆسایدی ئەنفالەوە، كە ڕژێمی سەدامی لەناوچوو بەسەر نەتەوەی كورددا هێنای، هەزاران گۆڕی بەكۆمەڵ لە بیابانەكانی باشوور و ناوەڕاستی عێراق دۆزراونەتەوە، یەكێك لە ئەركە هەرە لەپێشینە و سەرەكییەكانی دەسەڵاتی كوردی و خەمخۆرانی ئەو بوارە، هێنانەوەی ئەو گۆڕەبەكۆمەڵانە و دروستكردنی مۆنۆمێنتی نیشتمانیی گەورەیە بۆیان، دواتر كاركردنە بۆئەوەی بەجیهان بناسرێن كە چۆن رژێمی سەدام حسێن بۆ چەندینجار نەتەوەی كوردی جینۆساید كردووە.

 

تازەترین گۆڕی بەكۆمەڵ كە دۆزرایەوە، گۆڕی بەكۆمەڵی سەماوە بوو كە مرۆڤ تووشی شۆك دەكات، وێنەكانی قوربانییەكان و تێكەڵبوونی جەستەیان و دەیان دیمەنی شۆكهێنەر، بابەتی دەیان نووسین و سیناریۆی فیلم و چیرۆك و رۆمانن، هەروەها دۆكیۆمێنتكردنیان یەكێك لە كارە گرنگەكانە كە نابێت دوابخرێت.

 

لەو سەروبەندەدا بینیمان چۆن شاناز ئیبراهیم ئەحمەد خانمی یەكەمی عێراق، ئازایانە هاتەسەر هێڵ و سەردانی مەیدانیی گۆڕەبەكۆمەڵەكانی كرد و بەڵێنیدا هەموو هەوڵەكانی بخاتەگەڕ بۆ ئەوەی روفاتی پیرۆزی ئەو جینۆسایدكراوانەمان بهێنێتەوە بۆ ناو كەسوكاری خۆیان، كە ئەوە ئەوپەڕی وەفایە و پێویستە رێزی لێبگیرێت. هەروەها دەبێت دان بەوەشدا بنێین كە خانمی یەكەمی عێراق تەنها سیاسەتمەداری خەمخۆرە كە خاوەندارێتیی لە كەیسی گۆڕە بەكۆمەڵەكان دەكات و هەموو هەوڵ و پێگەی خۆی بەكاردەهێنێت بۆ ئەوەی شكۆدارانە بهانهێنێتەوە بۆ كوردستان.

 

لە سەرووی ئەوەشەوە، هەوڵەكانی بەجیهانناساندنی جینۆسایدی نەتەوەی كورد و ئاشناكردنی دەوڵەتانی زلهێز و نەتەوەیەكگرتووەكان بەو گۆڕەبەكۆمەڵانە، پێویستە ئەكتیڤ بكرێن و لۆبی بۆ بكرێت و دەیان كۆڕ و كۆنفرانسی لە دەرەوە و ناوەوەی كوردستان لەسەر سازبكرێن، ئەوە وادەكات ببێتە گەرەنتی رێگرتن لە دووبارەبوونەوەیان.

 

بەگرنگییەوە مامەڵەكردن لەگەڵ كەیسی گۆڕەبەكۆمەڵەكان و هێنانەوەیان، دەبێت بكرێتە یەكێك لە كارەكانی كابینەی دەیەمی حكومەتی هەرێمی كوردستان و بەرنامەی تایبەتیان بۆی هەبێت و بودجەی گەورەی بۆ تەرخان بكرێت، نەك بەشێوەیەكی رۆتینی و هەر لە ئاستی قسەدا بووترێت گرنگییان پێدەدرێت.

حەسرەتی كەسوكاریان بۆ هێنانەوەی رووفاتی ئازیزانیان، كە هاوكات كەسوكاری ئازیزی ئێمەیشن، لەسەر هەموومانی پێویست دەكات كە هەوڵەكانمان لەسەر چەندین ئاست بخەینەگەڕ بۆ ئەوەی رووفاتەكان بهێنرێنەوە ئامێزی پیرۆزی نیشتمان و بیكەینە بەشێك لە یادەوەریی نەمری هەموومان