Şarbajar – Di 28’ê Tebaxê de li Deşta Zelê ya li Şarbajar ku girêdayî parêzgeha Silêmaniyê ye, bi armanca nîşandana piştevanî û girîngiya berhemên xwemalî, mihrîcanek hat lidarxistin. 2’yemîn Mihrîcana Petêx ku bi beşdariya 170 cotyar û jinên destrengîn destpê kir, îro bi dawî dibe. Di mihrîcanê de cotyaran û jinên destrengîn berhemên xwe yên xwemalî dan nasîn.

‘Divê em girîngî bidin berhemên xwemalî’

Dîmen Babe Resûl ku xwedî karê xwe yê serbixwe ye, balkişand ser girîngiya berhemên xwemalî û wiha got: “Berhemên xwemalî di aliyê kalîteyê de baş in û tu madeyên kîmyewî tê de tunene. Ew jî dibe sedem ku nexweşî kêmtir bibe. Dema rêgirî li berhemên derve bê kirin, wê demê berhemên xwemalî wê zêdetir werin bikaranîn. Wê cotyar zêdetir girîngî bidin berhemên xwemalî. Lê belê dema ku berhemên derve tê, wê demê hem cotyar sar dibin û hem berhemên wan dimînin. Girîng û pêwîst e her sal ev cûreyên mihrîcanê werin lidarxistin. Gelek girîng e ku em bi xwe girîngî bidin berhemên xwe yên xwemalî.”