سلێمانی

 

پاش نیوەڕۆی ئەمڕۆ لە گردی دەباشان لە شاری سلێمانی، شاندی ئیمڕالی بە نوێنەرایەتی پەرلەمانتارانی دەم پارتی پەروین بوڵدان و سری سورەیا ئۆندەر، هاوسەرۆکی پارتی هەرێمە دیموکراتییەکان-دەبەپە کەسکین بایندەر، ئۆزگور ئەرۆل و ئیبراهیم بیلمەز لە فەرمانگەی یاسایی ئەسرین، هاووتەبێژی کۆمسیۆنی پەیوەندییەکانی دەرەوەی دەم پارتی، بەردان ئۆزتورک، پەرلەمانتاران گولجان کاچماس و مەهمەت کاماچ لەگەڵ هەریەک لە سەرۆکی یەکێتی نیشتمانی کوردستان، بافڵ تاڵەبانی و قوباد تاڵەبانی و شاناز ئیبراهیم ئەحمەد، ئەندامی مەکتەبی سیاسی یەنەکە، کۆبوونەوە.

 

دوای تەواوبوونی کۆبوونەوەکە، شاندەکە سەردانی مەزاری مام جەلالیان کرد و تاجە گوڵینەی ڕێزیان دانا و نامەیەکیان لە پەرتووکی یادەوەرییەکاندا نووسی.

 

پاشان لە کۆنگرەیەکی ڕۆژنامەنووسیدا لەسەر ناوی شاندەکە کەسکین بایندەر، وتەبێژی کۆمسیۆنی پەیوەندیەکانی دەرەوەی دەم پارتی، ئاماژەی بە کۆبوونەوەکانیان کرد و وتی: لەسەر گۆڕی مام جەلالەوە و بە ڕێزدارییەوە بەبیری دەهێنینەوە، بەڕێز مام جەلال لە ساڵی ١٩٩٣ـەوە چەندین جار خاوەنی هەڵوێست بووە و خاوەن ڕۆڵێکی گرنگ بووە بۆ چارەسەریی و ئاشتیی، ئەمڕۆش لە تورکیا بە دەستپێشخەریی ڕێزدار ئۆجالان ئەم پڕۆسەیە پێشدەکەوێت، لەبەر ئەوە پەیام و هەڵسەنگاندنی بەڕێز ئۆجالانمان گەیاند بە بەڕێزان بافڵ تاڵەبانی، قوباد تاڵەبانی و بەڕێز شاناز ئیبراهیم ئەحمەد.

 

لە درێژەی کۆنگرەکەدا کەسین بایندەر ڕایگەیاند، "لەو کۆبوونەوانەدا گفتوگۆمان لەسەر دواڕۆژی کورد و ئاشتی ناو گەلی کورد لە تورکیا و باکووری کوردستان کرد، هەروەها بەڕێزان بافڵ تاڵەبانی و قوباد تاڵەبانی دووپاتیان کردەوە لەم پرۆسەیەدا پێویستە هەموو لایەک ڕۆڵێکی کاریگەر و گرنگ بگێڕن، هەروەها بەڕێز شاناز ئیبراهیم ئەحمەدیش پشتیوانی خۆی بۆ پرۆسەکە دەربڕی، بۆیە با هەموو کوردان دڵخۆش بن کە هەموو لایەنە کوردییەکان ئەمڕۆ پشتیوانی لە پرۆسەکە دەکەن و لە ئەنجامی چاوپێکەوتنەکانمان دڵخۆشین.

 

جێی ئاماژەیە، شاندەکە لە دوو ڕۆژی ڕابردوودا لەگەڵ هەریەک لە مەسعود بارزانی و نێچیرڤان بارزانی لە شاری هەولێر کۆبوونەوە و سڵاوی ڕێبەری گەلی کورد، عەبدوڵا ئۆجالان و پرسی ئاشتی و یەکڕیزی کوردانیان گەیاند.