ناوەندی هەواڵ

 

لە گۆڕەپانی هیلڤیتیاپلاتز لە شاری زوریخی سویسرا بۆ زارا محەمەدی چالاکییەک ئەنجامدرا، کە لەسەر فێرکردنی زمانی کوردی بە منداڵانی کورد سزای ٥ ساڵ زیندانیکردنی بۆ دەرکراوەو ئێستا لە زینداندایە.

 

ئەندامانی بنەماڵەی زارا محەمەدی لە چالاکییەکەدا بەشدار بوون و کانی محەمەدی خوشکی زارا وتەیەکی پێشکەشکرد و داوای ئازادکردنی دەستبەجێی زارا محەمەدیی کرد، ئاماژەی بەوەکرد کە خوشکەکەی تەواوی ژیانی بەخشیوە بە فێرکردنی زمانی کوردی و وتیشی: "ماوەی ١٢ ساڵە بەبێ راوەستان و بە پێداگرییەوە کۆرس و خولی فێرکردنی زمانی کوردیی دەکردەوە و منداڵانی پەروەردە دەکرد، ئێمە شانازی بە کارەکانی زاراوە دەکەین. زارا دەبێت دەستبەجێ ئازاد بکرێت".

 

عەلی شیمشەک بە ناوی ئەنیستیتۆی زمانی کوردی وتەیەکی پێشکەشکرد و ئوەی خستەڕوو لە هەر چوار پارچەی کوردستان هێرش دەکرێتە سەر زمان، کولتور و ناسنامەی کورد، بۆیە پێویستە هەموو کورد لە دژی هێرشەکان خاوەنداری لە زمان، کولتور و ناسنامەی خۆیان بکەن.

 

دوای وتەکان، چالاکییەکە بە وتنی گۆرانی و هۆنراوە کۆتایی پێهات.