ناوەندی هەواڵ

 

ئەمڕۆ لە کۆنگرەیەکی ڕۆژنامەنووسیدا، عەبدولرحمان سدیق، سه‌رۆكی ده‌سته‌ی چاككردن و پاراستنی ژینگه‌ی هه‌رێمى کوردستان له ئیدارەى ‌سۆران سەربە پارێزگاى هەولێر، سەبارەت بە ژینگە و دارستانەکانی هەرێمی کوردستان ئاماژەی بەوەدا کە هەوڵدەدەن وەک ئیدارەی گەرمیان و ڕاپەڕین فەرمانگەی ژینگە لە سۆرانیش دەکەنەوە، ئەمەش وەک پێویستییەک بۆ پاراستنی ناوچەکە دەبێت.

 

سەرۆکی دەستەی چاککردن و پاراستنی ژینگە ئەوەشی خستەڕوو کە ساڵانی ڕابردوو بە شێوەی زانستی دار دەبڕدرایەوە بۆ سوتاندن، بەڵام لە ئێستادا زیان بە ژینگە دەگەیەندرێت، وتیشی: ده‌سته‌ی ژینگه‌ بیری له‌وه‌ كردووەته‌وه،‌ كه‌وا له‌ڕێگه‌ی كۆمپانیاكانی كه‌رتی تایبه‌تەوە دارستانی ده‌ستكرد دروست بكه‌ن و بۆ ئەو مەبەستەش دوێنێ له‌گه‌ڵ لایه‌نێكی جێبه‌جێكاردا گفتوگۆ کرا لەبارەى ئەوەى، كه‌ داری "پاولۆنیا" بهێننه‌ كوردستان و بیچێنن.

 

به‌پێی ئامار و ڕوپێوی به‌ڕێوه‌به‌رایه‌تی گشتی دارستان و پاوانى وه‌زاره‌تی كشتو‌كاڵى هەرێم، له ساڵی ٢٠١٠ وە تاوەكو ساڵی ٢٠٢٠ یه‌ك ملیۆن دۆنم زەوى لە ڕووبه‌ری ژینگه‌ی سروشتی كوردستان به‌هۆی بۆردومانه‌ به‌رده‌وامه‌كانی ده‌وڵه‌تی توركیا و تۆپبارانی تۆپخانه‌كانی ئێرانەوە سوتاون و له‌ناوچوون.

 

‌به‌پێی مادده‌ی ١٤ى خاڵی سێیه‌می ده‌ستوری عێراق ده‌بێت حكومه‌تی عێراق ناوچه‌ سنورییه‌كان بپارێزێت، هه‌ربۆیه‌ دەستەی ژینگە به‌رده‌وام له‌گه‌ڵ وه‌زاره‌تی ژینگه‌ی عێراق له‌ هه‌ماهه‌نگیدان بۆ كه‌مكردنه‌وه‌ی ئه‌و هێرش و په‌لامارانه‌ی له‌لایه‌ن ده‌وڵه‌تانی دراوسێی عێراقه‌وه‌ ده‌كرێنه‌ سه‌ر ژینگه‌ی كوردستان.

لە کۆتایی قسەکانیدا سەرۆکى دەستەى ژینگەى هەرێم باسی لەوەشکرد: به‌پێی بڕیار و ڕێنمایی نه‌ته‌وه‌ یه‌كگرتوه‌كان ده‌بێت به‌كارهێنراوه‌‌ ژینگه‌ییه‌كان له‌ شه‌ڕدا بپارێزرێن، چونكه‌ لە جه‌نگدا ته‌نها مرۆڤ ناكوژرێت و بریندار ناكرێت، به‌ڵكو دار و دره‌خت و ڕووه‌ك و زینده‌وه‌رانی دیکەش له‌ناوده‌چن، كه ‌ئه‌مه‌ش ڕاسته‌وخۆ تێكدان و له‌ناوبردنی ژینگه‌یه‌.

 

ت.پ