ناوەندی هەواڵ- ناوچە کەنارییەکانی سووریا شاهیدی ڕووداوی خوێناوی بوون کە زیانی زۆری مرۆیی لێکەوتووەتەوە، ئەمە جگە لەوەی هەزاران کەس بێسەروشوێن و تەرم لە نەخۆشخانەکان ڕاگیراون بەبێ ئەوەی بگەڕێندرێنەوە بۆ بنەماڵەکانیان.

 

ڕوانگەی سووری بۆ مافەکانی مرۆڤ ڕۆژی ٩ی نیسان ڕایگەیاند کە ژمارەی کوژراوانی کۆمەڵکوژییەکانی جیهادیەکانی هەتەشە گەیشتووەتە هەزار و ٦٧٦  کەس، کوژرانی ١٧ کەس بەڵگەدار کراوە کە چواریان ژن بوون و لە چەند ڕۆژی ڕابردوودا لە بانیاس کوژراون.

 

پشتڕاستی کردەوە کە ٦٢ کۆمەڵکوژی لە ناوچە کەنارییەکانی سووریا بەڵگەی کردووە و لە ئەنجامدا ٨٦٦ کەس لە لازقیە، ٥٢٥ کەس لە تەرتوس، ٢٧٢ کەس لە حەما و ١٣ کەس لە حومس گیانیان لەدەستداوە، جگە لەو کۆمەڵکوژییانەی ئەنجامدراون، هەزاران کەسی بێسەروشوێن و سەدان تەرم لە نەخۆشخانەکاندا ڕاگیراون بەبێ ئەوەی ڕادەستی کەسوکاریان بکرێن.

 

سەرەتای ئەم مانگە، ڕێکخراوی لێبوردنی نێودەوڵەتی ڕاپۆرتێکی بڵاوکردەوە کە ڕووداوەکانی کەناراوەکانی سووریای بە پشتبەستن بە بەڵگەی بینراو و گێڕانەوەی شایەتحاڵەکان بە "تاوانی جەنگ" پێناسە کرد.