توندوتیژی دژ بە ڕۆژنامەنووسانی ژن ڕوو له زیادبوونه
بەڕێوەبەری توێژینەوە لە ناوەندی نێودەوڵەتی بۆ ڕۆژنامەنووسان "ICFJ" دەڵێت: جۆرەکانی هەڕەشە کە ڕووبەڕووی ژنانی ڕۆژنامەنووس دەبنەوە لە دیجیتاڵدا ڕوو لە زیادبوونە.
ناوەندی هەواڵ
جولی پۆسەتی، بەڕێوەبەری توێژینەوە لە ناوەندی نێودەوڵەتی بۆ ڕۆژنامەنووسان "ICFJ" لە کۆنفرانسێکی نێودەوڵەتیدا کە لە ئیتاڵیا بەڕێوەچوو، ڕایگەیاند کە ژنانی ڕۆژنامەنووس ئەگەری زیاتریان هەیە ڕووبەڕووی توندوتیژی ببنەوە و ئەمەش لە زیادبووندایە.
وتیشی: توانایەکی گەورە هەیە بۆ ئێمە بۆ نەهێشتنی زیانەکانی توندوتیژی دیجیتاڵی، بەڵام کۆمپانیاکان بەرپرسیارێتی لەو بارەیەوە هەڵناگرن.
کۆنفرانسەکە تیشکی خستە سەر هێرشە دیجیتاڵییەکان، لەوانە سوکایەتیکردن، لێدوانی زایەندی، هەڕەشەی کوشتن دژی ڕۆژنامەنووسان و خێزانەکانیان.
لە لێکۆڵینەوەیەکی هاوبەشدا کە لە ساڵی ٢٠٢٢لەلایەن ٩٠٠ ڕۆژنامەنووسی ١٢٥ وڵاتەوە ئەنجامدراوە، سێ لەسەر چواری ڕۆژنامەنووسی ژن ئاشکرایان کردووە کە بەهۆی کارەکانیانەوە ڕووبەڕووی توندوتیژی یان هەڕەشە بوونەتەوە.