سلێمانی

 

دایکانی لەچک سپی لە بەردەم نوسینگەی پەرلەمانی عێراق گردبوونەوە و بەیاننامەیەکیان بە دروشمی "لەچکە سپیەکانمان بەرامبەر شەڕ دەکەین بە چەک" ئاڕاستەی پەرلەمانی عێراق کرد و یاداشتێکیان پێشکەشکرد.

 

دەوڵەتی تورکیا لە ١٧ی نیساندا هێرشی داگیرکاری بۆ سەر باشوری کوردستان دەستپێکرد، ئەم هێرشانە ناڕەزایەتی توێژە جیاوازەکانی کۆمەڵگەی باشور و کوردانی لە چوار پارچەی کوردستان لێکەوتەوە، دایکانی لەچک سپیش کە پێکدێن لە دایکانی بەتەمەن و دایکی شەهیدان بەرامبەر هێرشەکانی دەوڵەتی تورکیا ناڕەزایەتییان دەربڕێ و داوا دەکەن چیتر حکومەتی عێراق و هەرێمی کوردستان بەرامبەر هێرشەکان بێدەنگ نەبن و خاکی کوردستان نەدەنە دەستی دوژمنان.

 

فەوزییە عەبدولکەریم، وەک نوێنەر بەیاننامەی دایکانی لەچک سپی خوێندەوە و تێیدا هاتووە، "ئەگەرچی ڕۆژ بە ڕۆژ نیازی داگیرکاری و ئەقڵیەتی فاشیستی دەوڵەتی تورک بەرەو هەڵوەشاندنەوە دەچێت و ئازادبوونی کوردستان مسۆگەر دەبێت، بەڵام ئەم دەوڵەتە، وەک دواڕۆژەکانی خۆی کوردستان تاڵان و وێران دەکات، بە سیاسەتی داگیرکاری، پاکتاوکردن، بڕینی دارەکان، چەکی کیمیای و بۆمب، لە ئەنجامدانی هەموو جۆرە کردەوە و تاوانێکی بەدەر لە مرۆڤایەتی، هەموو ڕۆژێک خوێنی ڕۆڵەکانمان دەڕێژێت، کە ئەو ئازارە، هێزمان پێدەبەخشێت و وامان لێدەکات لە مەیداندا بین".

 

"وەک دایکان دەنگی ئاشتیخوازانەمان بەرز دەکەینەوە"

هەروەها ئاماژە بەوەدەدەن کە ئەرکی سەرشانی هەر تاکێکی کوردە بەرگریکار و داکۆکیکاری پرسی خاک و وڵاتەکەی بێت، "هەڵوێستی دایکان هەڵوێستێکی مانادار و بەشکۆ و گرنگە، ئێمە وەک دایکان هەموو جۆرە پیلانگێڕیەک ئیدانە دەکەین، وەک دایکانی باشوری کوردستان هەوڵی کۆتایهێنانی داگیرکاری دەدەین و دەنگی ئاشتیخوازانەمان بەرز دەکەینەوە و دەڵێین 'ئێمە چیتر نامانەوێت ڕۆڵەکانمان لەدەست بدەین'".

 

بە چەند خاڵێک داواکاری خۆیان ئاڕاستەی پەرلەمانی عێراق کرد:

١- داوا لە هێزە نێودەوڵەتی و جیهان و نەتەوەیەکگرتووەکان و رێکخراوەکانی مافی مرۆڤ دەکەین، کە بانگەشەی ئازادی دەکەن هەڵوێستی بە پەلەیان هەبێت.

٢- داوا لە سەرۆک وەزیرانی حکومەتی عێراق و ئەنجومەنی نوێنەرانی عێراق دەکەین، ئەم بێدەنگییە بشکێنن و نەهێڵن ڕۆڵەکانمان شەهید ببن.

٣- ڕێگە بە هیچ هێزێکی ناوخۆیی نادەین ببێتە جەلادی ڕۆڵەکانمان، بەڵکو دەبێت بێتە بەرەی گەل و لەسەر دادپەروەری بێنە دەنگ.

٤- دەبێت گەلی کورد لە هەموو بارودۆخێکدا ڕۆڵی زامنکردنی خاک و گەلی خۆی هەبێت.

٥-وەک دایکانی لەچک سپی داوا لە هەموو دایکانی لەچک سپی کوردستان دەکەین لەچکەکانیان پێکەوە گرێبدەن و بیکەنە قەڵغانی ئاشتی و ئازادی.