ناوەندی هەواڵ

 

بەبۆنەی ٢٥ی تشرینی دووەم، ڕۆژی جیهانی بەرەنگاربوونەوەی توندوتیژی دژی ژنان، ڕەنگین عەبدوڵا، ڕۆژنامەنووس و نووسەر لە تۆڕی کۆمەڵایەتی فەیسبووک نووسیوویەتی: توندوتیژی پێش ئەوەی برینی سەر جەستە و زامی پڕ ئازاری لەش بێت، بەرلەوەی هاوار و ناڵەی دەرونێکی شەکەت و هەگبەی خەمێکی قوڵ بێت، کولتوورێکی چەپەڵە و لە چاوتروکانەوە لە دایک دەبێت، لە هەموو ماڵ و گەڕەکێک، لە پۆل و قوتابخانە و زانستگە، لە چایخانە و کافێ و چێشتخانە و هەموو خانەکانی تری نیشتمان بە جۆرێک لە جۆرەكان خۆی بەرهەم دێنێتەوە، ئەمە بۆتە کولتوور و کولتوورێکی قێزەونیشە، ناشرینیەکەشی لەوەدایە، کامەیان شانامەی مرۆڤدۆستی و رەفتار باڵایی دوپات دەکەنەوە، لە هەمووان دڵڕەقترن.

 

ئاماژەی بەوەشکردووە، جارێک ژنە ئەکتەری تورک (بیرین سات) بۆ ئازاری مردنی کچە کوردێك نوسیبووی: ئێمە واین، هەر منداڵین ڕوبەڕووی ئازاری چاوی شۆفێری تەکسیەکان دەبینەوەو گەنجەکانی کۆڵان تەنگ بە ڕوحمان هەڵدەچنن، لە شوێنە گشتیەکان دەکەوینە بەر پەلاماری زمان و تانەو تەشەری خەڵکەوە، ئەم تارماییە بۆ ئەبەد بەشوێنمانەوەیە و هەر دەمێنێت، قەدەرێکی سەیری دنیای ئێمە ئەم توندوتیژیەیە.

 

نووسیوشیەتی: ژیان و گیانی مرۆڤ موقەدەسە، ڕۆح و دەرونی ژن پیرۆزە، لە کچ و خوشکەوە، بۆ دایک و هاوژین، هەموویان لە پرۆڤەی ئەوەدان لە گەورەییدا بەهەشت بکەوێتە ژێر پێکانیانەوە، بەڵام لایەنگرانی عەقڵ و ئاکاری شەیتانیی، بەبێ پاساو و بیانو، بێ هۆکار و پاڵنەر، سات بە سات و ڕۆژ بە ڕۆژ لە پەیڕەوکردنی توندوتیژی و پەلاماردانی دایکانی بەهەشت بەردەوامن، ئەوانەی چێژ لە توندوتیژی دەبینن، ئەوانەن کە ڕقیان لە ژیان و گیان و ئازادیی دەبێتەوە، ئەفسوس هەر دەمێنێت.

 

لە کۆتایی نووسینەکەیدا ڕەنگین عەبدوڵا ئاماژەی بەوەکردووە، ٢٥ی تشرینی دووەم ڕۆژی وەستانەوەیە لەبەرامبەر توندوتیژی، با هەمووان لە زمان و ڕەوشت و ڕەفتارەوە پابەندی مۆڕاڵی ناتوندوتیژی بین.