نازیە ئەحمەد، بەڕێوەبەری خوێندنگایەکی گشتی لە پارێزگای پەروان لە چاوپێکەوتنێکی تایبەتدا لەگەڵ ئاژانسی نوژنها سەبارەت بە دۆخی ژنان لە ئەفغانستان ئاماژەی بەوەکرد، بەهۆی گەشتنی تالیبان بۆ شارەکەیان کارەکەی لەدەستداوە و بەوهۆیەوە لە دۆخێکی ئابووری خراپدایە، وتی: "بەڵام ژنان دەبێت بە هەر جۆرێک بێت کاربکەن و دژی ئەو بارودۆخەی لە وڵاتەکەیاندا دەگوزەرێت بجەنگن، چونکە هیچ ئاشتییەک بە بێ تێکۆشان بەدەستنایەت و دەبێت هەموو ژنانی ئەفغانی بەشداری ئەو تێکۆشانە بکەن".

 

لە ماوەی ٤٣ ساڵی ڕابردووی ئەفغانستاندا ئەو پارتانەی کە دەسەڵاتیان گرتەدەست وازهێنانیان لە خوێندن بەسەر ژناندا سەپاند و ژنان هەمیشە کاریگەرییان لەسەربووە لە ململانێ سیاسییەکانی ناوچەکە، هەر بۆیە ژنانی ئەفغانی خویندنیان وەک گرنگترین دەستکەوتی ژیانیان دەبینن.

 

نازیە، لە کۆتایدا وتی: " پێویستە هەموو ژنانی ئەفغانی سەرەتا ببنە خوێندەوار و پاشان بتوانن ڕێکخراوێک پێکبهێنن بۆ ئەوەی شەڕ لە دژی نادادییەکانی تاڵیبان بکەن بۆ بەدەستهێنانی ئازادی، ئێمەی ژنان دەبێت خۆمان هەوڵی بەدەستهێنانی مافەکانمان بدەین، هۆشیاری خۆمان بەرزبکەینەوە و تێکۆشان بکەین بۆ ژیانێکی ئازاد و پڕ ئاشتی".