پەروەردەی بەردەوام چەمکێکی مۆدێرنە، گرنگی بە ئاستی هۆشیاریی ژینگەیی و کۆمەڵایەتی لەنێو تاکەکاندا دەدات، بە ئامانجی پەرەپێدانی کۆمەڵگەیەک کە توانای چارەسەرکردنی ئاستەنگە ژینگەیی و کۆمەڵایەتی و ئابوورییەکانی هەبێت، ئەم پەروەردەیە ئامانجی ئەوەیە تاکەکان ئەو لێهاتوویی و زانیاریانەی کە پێویستن بۆ بەدەستهێنانی گەشەسەندنی بەردەوام بەدەستیبهێنێت.

چەمکی پەروەردەی بەردەوام
پەروەردەی بەردەوام، ئاماژەیە بۆ پرۆسەی فێرکردنی تاکەکان چۆن لە ژینگەیەکی بەردەوامدا بژین، ئەم پرۆسەیە فێربوون لەبارەی پاراستنی سەرچاوە سروشتییەکان و تێگەیشتن لە کارلێکەکانی نێوان سیستمی ژینگەیی و ئابووری و کۆمەڵایەتی لەخۆدەگرێت، هەروەها پەروەردەی بەردەوام، بیرکردنەوەی رەخنەگرانە و داهێنانە لە رووبەڕووبوونەوەی ئاستەنگەکاندا، بەرەوپێش دەبات.

ئامانجەکانی پەروەردەی بەردەوام
١-بەرزکردنەوەی ئاستی هۆشیاریی ژینگەیی، بەرزکردنەوەی تێگەیشتنی تاکەکان لە کێشە ژینگەییەکانی وەک گۆڕانی کەشوهەوا و لەدەستدانی جۆراوجۆری زیندوو.
٢-پێشخستنی بەشدارییکردنی کۆمەڵگە، هاندانی تاکەکان بۆ بەشدارییکردنی چالاکانە لە پرسەکانی ژینگە و گەشەپێدانی بەردەوام.
٣- پەرەپێدانی تواناکانی بیرکردنەوەی رەخنەگرانە، فێرکردنی تاکەکان و چۆنیەتی شیکردنەوەی کێشەکان و دۆزینەوەی چارەسەری داهێنەرانە.
٤-پێشخستنی دادپەروەریی کۆمەڵایەتی، تێگەیشتن لە پەیوەندیی نێوان بەردەوامیی و دادپەروەری کۆمەڵایەتی و کاریگەریی چۆنیەتی  تەحەددیاتی ژینگەیی لەسەر گروپە لاوازەکان.

ستراتیژەکانی پەروەردەی بەردەوام
١-فێربوون لەسەر بنەمای پڕۆژە. بەکارهێنانی پڕۆژەی پراکتیکی بۆ بەرزکردنەوەی زانیاریی و لێهاتووییەکانی پەیوەست بە بەردەوامیی.
٢- فێربوون لە رێگەی کردارەوە. بەشدارییکردنی خوێندکاران لە چالاکییە کۆمەڵایەتییەکان، کە بەشدارن لە باشترکردنی ژینگە.
٣-تەکنۆلۆژیا و داهێنان. بەکارهێنانی تەکنۆلۆژیای سەردەم بۆ دابینکردنی ئەزموونی فێرکاری کارلێککارانە و داهێنەرانە.
٤-هاوکاری نێوان دامەزراوەکان. پەرەپێدانی هاوبەشی لە نێوان قوتابخانەکان، زانکۆکان و رێکخراوە ناحکومییەکان بۆ گەیشتن بە ئامانجە هاوبەشەکان.

 

نموونەی پڕۆژە پراکتیکییەکان لە پەروەردەی بەردەوامدا
١-باخچەی قوتابخانەی بەردەوام. دروستکردنی باخچەیەک لەناو قوتابخانەدا، بۆ فێرکردنی فێرخوازەکان دەربارەی کشتوکاڵی بەردەوام و جۆراوجۆری زیندەوەران.
٢-پرۆژەی ریسایکلکردن. رێکخستنی پرۆگرامێک بۆ ریسایکلکردنی کەرەستەی وەک پلاستیک و کاغەز، هاوکات فێرکردنی فێرخوازان چۆن پاشماوە جیابکەنەوە.
٣-هۆشیاری وزەی نوێبووەوە. جێبەجێکردنی پڕۆژەیەک کە بریتییە، لە دانانی پانێڵی خۆر، لەگەڵ وانەکان لەسەر سوودەکانی وزەی نوێبووەوە.
٤-پرۆگرامی پاککردنەوەی کۆمەڵگە. رێکخستنی هەڵمەتی پاککردنەوەی سەیرانگە یان پارکەکان، هۆشیارکردنەوەی خەڵک لە گرنگی پاراستنی ژینگە.
٥-پەروەردەی ژینگەیی لە سروشتدا. رێکخستنی گەشتی مەیدانی بۆ یەدەگەکانی سروشت بۆ فێرکردنی فێرخوازەکان دەربارەی جۆراوجۆری زیندوو.
٦-پڕۆژەی ئاوی بەردەوام. لێکۆڵینەوە لە بەکارهێنانی ئاوی باران، یان دامەزراندنی سیستمی پاککردنەوەی ئاوی پیس.
٧-هەڵمەتی هۆشیاری. رێکخستنی ۆرک شۆپ لەسەر بابەتەکانی وەک گۆڕانی کەشوهەوا و پیسبوون. 
٨-پرۆژەی کشتوکاڵی شار، هاندانی قوتابیان بۆ چاندنی رووەک لە ماڵەکانیان، یان لە باڵکۆنەکانیان.

رۆڵی مامۆستایان و پەروەردەکاران
مامۆستایان و پەروەردەکاران بۆ سەرکەوتنی پەروەردەی بەردەوام، پێویستە لەسەر چەمکەکانی بەردەوامیی راهێنراو بن و توانای پاڵنەریان هەبێت بۆ خوێندکاران، بۆ بیرکردنەوەی رەخنەگرانە و بەشداری چالاکانە لە پرسە ژینگەییەکان.
پەروەردەی بەردەوام، هەنگاوێکی گرنگە بۆ گەیشتن بە داهاتوویەکی باشتر بۆ نەوەکانی داهاتوو، ئەمەش بە بەرزکردنەوەی هۆشیاری و زانیاری و بەشدارییکردن، تاکەکان دەتوانن ببنە پێشەنگ لە رووبەڕووبوونەوەی ئاستەنگە ژینگەیی و کۆمەڵایەتییەکان، بەمەش گەشەسەندنی بەردەوام بەدەستبهێنن، کە هاوسەنگی لە نێوان پێداویستییەکانی ئێستا و داهاتوودا دروست بکات.