غوفران ئەلڕادی

بەغدا- بەپێی لێدوانەکانی وەزارەتی پلاندانان لەئەنجامی جەنگ و ئۆپەراسیۆنی تیرۆریستی و سەربازی ژمارەی ژنانی بێهاوژین لەعیراق گەیشتووەتە نزیکەی یەک ملیۆن و ٥٠٠ هەزار ژن، لەگەڵ زیادبوونی فایلەکانی جیابوونەوەو ژمارەی ژنانی بێهاوژین گۆڕانکاری ئابووری و قەیرانی کار هەبووەو بەو هۆیەوە نور هودە ئەلتەمیمی بیر لە کردنەوەی کارگەی دورین و دامەزراندنی ژنانی بێهاوژین لە کارگەکەدا دەکایتەوە.

 

"دەرفەتی هەمیشەیی پێویستە بۆ ژنانی جیابووەوە و بێهاوژین نەک یارمەتی کاتی"

نور بەڕێوەبەری کارگەی سەردەمی زێڕین، دوور نەبوو لە ئاگاداربوون لە دۆخی ژنانی جیابووەوە و بێهاوژین، چونکە ساڵانێکە لە هاوکاریکردنی ژناندا چالاک بووە و وتی: "دوای چەند ساڵێک کارکردن لە مەیدانەکە بۆ یارمەتیدانی ئەو ژنانە و منداڵەکانیان زانیم کە ئەگەری کارکردنی ژنان هاوکاری کاتی و وەرزی نییە بەڵکو پێویستە هەموو ژنان کار بکەن و ڕووبەڕووی ژیان ببنەوە کارکردن ڕێگە بە ژنان دەدات بە شێوەیەکی ئەرێنی سەیری ژیانیان بکەن".

 

ئاماژەی بەوەشدا کە ناساندنی ژنان بۆ بازاڕی کار پێویستی بە ئاوەدانی و گەشەپێدان هەیە و وتی: "جەختم لەسەر پەروەردەکردنی ژنان کردووەتەوە لەسەر چۆنیەتی مامەڵەکردن لەگەڵ کێشەی کار و ڕووبەرووبوونەوەی شوێنی کار و پاراستنی مافەکان و چۆنیەتی کارکردن".

 

"گەشەپێدانی توانای هزری و پیشەیی بۆ ژنان سەرکەوتن دەهێنێت"

ئەو دەبینێت کە پەرەسەندنی لێهاتوویی دەروونی و پیشەیی ژنان ڕۆڵێکی سەرەکی هەیە لە سەرکەوتنی ژنان لە ئەزموونی کاردا بەتایبەتی کە زۆرێک لە ژنان ئەزموونی پراکتیکیان نەبووە و پەیوەندی ڕاستەوخۆیان بە کۆمەڵگاوە نەبووە، وتی: "زۆربەی ژنە بێهاوژینەکان لە خێزانە کۆنەپەرستەکانن کە هیچ ئەزموونێکیان لە ژینگەی کاردا نییە و خوێندنیان تەواو نەکردووە".

 

کارگەی سەردەمی زێڕین نزیکەی ٥٠ ژنی تێدایە بەشێکی زۆریان ژنانی جیابووەوەو بێهاوژینن بۆ ئەوەی بژێوی ژیانیان دابین بکەن و داهاتێکی مانگانەی جێگیر دابین بکەن لەوێدا کاردەکەن، نور هودە  ئاماژەی بەوەشکرد، کە دەبێت داهاتی مانگانەی ژنان بەشی خۆیان و منداڵەکانیان بکات و ئامانجیشی ئەوەیە کە بەرهەمی کار بکرێتە سەرچاوەیەک بۆ ژنان.

 

"ڕۆحی خۆشەویستی و یارمەتی ژنان لە شوێنی کاردا کۆ دەکاتەوە"

نور وتیشی: "زۆر لە ژنان دەتوانن لە ڕووی شێواز و دیسپلینەوە نوێگەری بکەن بۆ ئەوەی لە بازاڕدا زیاتر بناسرێنەوە و پەسەند بکرێن".

 

سەبارەت بەپەیوەندییەکانی نێوان ژنانی کرێکار وتی: "ڕۆحی خۆشەویستی و یارمەتی هەیە ژنان وەک یەک خێزانن و هاوڕێیەتییەکی بەهێزیان هەیە و یارمەتی یەکتر دەدەن لە کارەکانیاندا".