سلێمانی

 

ئەمڕۆ لە کۆنگرەیەکی ڕۆژنامەنووسیدا، پارتی سەوزی کوردستان بە هاوبەشی چەند ڕێکخراوێکی ژینگەیی ئیدانەی پێدانی نامامگە حکومییەکانیان بە کەرتی تایبەت کرد و ڕاشیانگەیاند کە نابێت چیتر وێرانکردنی ژینگەی کوردستان لەلایەن تورکیاوە قبوڵ بکرێت.

لە کۆنگرەکەدا ملکۆ بازیانی، سەرۆکی پارتی سەوزی کوردستان، ئاماژەی بەوەدا: وەزارەتی کشتوکاڵ و سەرچاوەکانی هەرێمی کوردستان ئامادەیی خۆی دەربڕیوە، سەبارەت بەوەی کە نەمامگە حکومییەکانی پارێزگاکانی هەولێر و سلێمانی و دهۆک و هەڵەبجە و ئیدارەی گەرمیان، بدرێن بە کەرتی تایبەت، کە لە پارێزگای هەولێر پێنج نەمامگە و پارێزگای سلێمانی شەش نەمامگە دهۆک چوار نەمامگە، هەروەها  پارێزگای هەڵەبجە و ئیدارەی گەرمیان-یش هەریەکە و نەمامگەیەکیان دەدرێتە کەرتی تایبەت لەگەڵ باخێکی زەیتون لە گەرمیان.

 

هەروەها وتیشی: وەزارەتی کشتوکاڵ و سەرچاوەکانی ئاو لە ئێستادا لیژنەیەکیان پێکهێناوە بۆ خەمڵاندنی نەمامگەکان، بۆیە ئێمە وەک پارتی سەوزی کوردستان دژی ئەو بڕیارە دەوەستینەوە و داوای دەستبەجێ ڕاگرتی بەکرێدانی نەمامگە حکومییەکان دەکەین بە کەرتی تایبەت، چونکە پێمانوایە خەڵک و ژینگە زەرەرمەندی یەکەمن لەو نێوەندەدا.

 

وەزارەتی کشتوکاڵ و سەرچاوەکانی ئاو لە باشوری کوردستان، مانگی ئەیلولی ساڵی ڕابردوو، بەژمارە (٥٥٣٢) نوسراوێکی ئاراستەی حکومەتی هەرێمی کوردستان کرد، بۆ ڕەزامەندی دەربڕین لەسەر بە تایبەتکردنی نەمامگە حکومییەکان.

 

ت.پ