سارا شێخ حەسەن

حەلەب- لە ١٨ی مارسی ٢٠١٨دا دوای ٥٨ ڕۆژ بەرخۆدان، دەوڵەتی تورکیا شاری عەفرینی لە باکور و ڕۆژهەڵاتی سوریای داگیرکرد، لە شەوێکی شەوەزەنگدا ٤٠٠ هەزار دانیشتووی شارەکە ناچاربوون کۆچ بکەن و لەدەست داگیرکاری دەوڵەتی تورکیا خۆیان ڕزگار بکەن، داگیرکاری دەوڵەتی تورکیا لە عەفریندا ئاستی باڵای بەخۆیەوە بینی، ئەو ئاوارانەی شاری عەفرینیان بەجێهێشت ماوەی سێ ساڵە لە بارودۆخێکی سەختدا دەژین، لە ناو عەفرینیشدا تاوانی دژ بە مرۆڤایەتی ئەنجام دەدرێت، دەوڵەتی تورک هاوڵاتیان دووچاری کوشتن، تاڵانکردن، دەستدرێژی و فڕاندن دەکەنەوە، هەتا ئێستاش دانیشتووانی عەفرین لە کۆچکردن بەردەوامن بەرەو ناوچە ئارامەکان و تاوانەکانی دەوڵەتی تورک بە بەڵگەوە پیشان دەدەن، دانیشتوانی عەفرینیش تا ئێستا ئومێدی گەڕانەوە بۆ خاکی خۆیان لە دڵیاندا زیندووە.

 

دەوڵەتی تورک لە ٢٠ کانوونی دووەمی ٢٠١٨دا بە ٧٢ فڕۆکەی جەنگی هێرشی کردە سەر عەفرین، گەلی عەفرین لەگەڵ شەڕڤانان ٥٢ ڕۆژ لە دژی هێرشەکان بەرخۆدانییان کرد، لە جەنگی دووەمی جیهانیشەوە تا ئێستا هیچ شەڕێکی هاوشێوەی شەڕی عەفرین ڕووی نەداوە، لە هێرشەکەدا هەزاران هاوڵاتی مەدەنی بە ژن و منداڵەوە ڕفێندران، بە بارمتە گیران، دەستدرێژیان کرایەسەر و گیانیان لەدەستدا، ئاوارەکانی عەفرین کە لە گەڕەکی شێخ مەقسود لە حەلەب نیشتەجێن لە ساڵیادی داگیرکردنی عەفریندا بۆچوونی خۆیان دەخەنە ڕوو.

 

هیوای گەڕانەوە بۆ عەفرین

هاجەر عەلی دانیشتووی ناوچەی ماباتا-ی هەرێمی عەفرینە، باس لە هێرش و کردەوەکانی دەوڵەتی تورک لە عەفرین دەکات و دەڵێت: "ئێمە پێ دەنێینە جوارەمین ساڵ کە لە خاکی خۆمان کۆچمان کردووە، عەفرین ئێستا لەژێر داگیرکاری دەوڵەتی تورکدایە ئێمە ئەمە هەمیشە لە بیرماندایە، ئێمە بەزۆر عەفرینمان بەجێهێشت، ڕۆژانی شەڕ لە عەفرین سەخت بوو، ئەوەندەی ئازارەکەمان ئێمە بۆ ژیان شەڕ دەکەین، نازانین کەی دەگەڕێینەوە بەڵام بە ئومێدی گەڕانەوە دەژین."

 

هاجەر باس لە عەفرین دەکات و دەڵێت: "عەفرین هەرێمێکی ئارام بوو لە باکور و ڕۆژهەڵاتی سوریادا، خاکێکی دەوڵەمەند بوو، عەفرین هی ئێمەیە، ئێمە بە دەستی خۆمان بنیادمان ناوە، ئەو کاتەشی بەجێمان هێشت بە خاک و ئاسمانەکەیمان وت کە دەگەڕێینەوە".

ئەو ژنە کۆچبەرە ئاماژە بەوە دەکات بە بەرخۆدان دەتوانین سەربکەوین و دەڵێت: "دەوڵەتی تورک تا ئێستا لە دژی گەلەکەمان کۆمەڵکوژی دەکات، بە بەرخۆدانی خۆمان دەگەڕێینەوە عەفرینی خۆمان، ڕزگارکردنەوەی عەفرین هەرچییەک بخوازێت ئێمە ئامادەین بیبەخشین بۆی، لە ئاست عەفریندا گیانیشمان کەمە تا بیبەخشین، عەفرین شاری ئەو شێر و پڵنگانەیە کە گیانی خۆیان بۆ فیداکرد، وەک ئارین میرکان و ئاڤێستا خاپوور، بۆ ڕۆحی ئەو شەهیدانە ئێمە بەردەوامین لە تێکۆشان".

 

عەفرین سرودی بەهەشتە

سدیقە محەمەد ڕەشۆ داگیرکردنی عەفرین لەلایەن دەوڵەتی تورک و چەتەکانیەوە شەرمەزار دەکات و بانگ لە دەوڵەتانی نێودەوڵەتی دەکات کە پشتگیری لە دانیشتووانی عەفرین بکەن بۆ گەڕاندنەوەی عەفرین، بۆچوونی خۆشی وەها هێنایە سەر زمان: "تەمەنم ٩٠ ساڵە لە عەفرینی ڕەنگاوڕەنگدا لەدایکبووم و گەورەبووم، مافی دەوڵەتی تورک نییە خاکی ئێمە داگیر بکات، من وەک خۆم تێکۆشان دەکەم تا ڕزگارکردنەوەی عەفرین، تۆپبارانی عەفرینیان کرد، ماڵەکانمانیان تاڵانکرد، پیرەکانیان سەردەبڕی و منداڵەکانمانیان شەهید کرد، دارە زەیتونەکانمانیان لە ڕەگەوە دەرکرد، عەفرینی من گوڵی چوار پارچەی کوردستانە، بەهەشتی جیهانە، دوژمنان وایان لە ئێمە کرد، ٣٦٦ گوند لە عەفرین هەیە، هەموومان ژیانێکی هاوبەشمان هەیە، دەوڵەتی تورک کاری چییە لەناوماندا؟".

 

دایە سدیقە باس لە ڕۆژانی کۆچبەری دەکات و دەڵێت: "دەوڵەتی تورک ناچاری کۆچبەری کردین، پیر و منداڵمان لە ڕێگەدا گیانیان لەدەستدا، ئێمە کوردین، بۆچی لە جیهاندا مافی هەموو نەتەوەیەک هەیە، کورد نییەتی، ڕێکخراوەکانی مافی مرۆڤ و نەتەوە یەکگرتووەکان لەسەر کوردی پێغەمبەران دانیشتوون و مافی مرۆڤیش ژێر پێ دەنرێت".

 

لەکۆتایشدا دایە سدیقە دەڵێت ئەگەر ڕۆژێکم لە تەمەندا مابێت دەگەڕێمەوە عەفرین، بەم زوانە دەگەڕێینەوە و دەبێت دەوڵەتی تورک سزا بدرێت.