شنیار بایز

سلێمانی- بەرەبەیانی رۆژی ١٧ی کانوونی یەکەم، بەهۆی بارینی تاوە باران لە هەرێمی کوردستان، لافاو لە بەشێک لە گەڕەکەکانی شاری هەولێر دروستبوو، کە ١٢ کەس لە هەولێر و کەسێکی دیکەش لە شارۆچکەی تەکیە گیانی لەدەستدا، زیانێکی ماددیش بە هاوڵاتیان گەشت، ماڵێکی زۆر ئاویان تێچووە و سەدان ئۆتۆمبێل بەوهۆیەوە کەوتبوونە ژێر لافاوەوە، یان لافاوەکە تێکی شکاندوون.

 

بە مەبەستی هاوکاری و کۆمەک، دوێنێ لە شاری سلێمانی کەمپەینی هاوکاری بۆ زیانلێکەوتووانی لافاوەکەی شاری هەولێر لەلایەن ١٠ ڕێکخراوەوە ڕاگەیەندرا، کەمپینەکە بۆ ماوەی سێ ڕۆژ بەردەوام دەبێت و ئەمڕۆ دووەم ڕۆژی کەمپەینەکەیە.

 

کەمپەینەکە ماوەی سێ ڕۆژ دەخایەنێت

پەری عومەر، سەرۆکی ڕێکخراوی پەری بۆ گەشەپێدانی کاری مرۆیی، دەربارەی کەمپەینەکە و کۆکردنەوەی هاوکاری بۆ نوژنها دووا و وتی: لە سۆنگەی بەرپرسیارێتیمان ١٠ ڕێکخراوی کۆمەڵەی مەدەنی کەمپەینێکمان بۆ کۆکردنەوەی هاوکاری بۆ زیانلێکەوتووانی لافاوەکەی شاری هەولێر ڕاگەیاند.

 

ڕێکخراوە بەشداربووەکان پێکدێن لە ڕێکخراوی پەری بۆ گەشەپێدانی کاری مرۆیی، ڕێکخراوی سەنتەری لوڕ، ڕێکخراوی ماهی بۆ پەروەردەی منداڵ، ڕیکخراوی بێناز، ڕێکخراوی گەشەپێدانی مرۆیی، ڕێکخراوی گەشە بۆ تواناکانی لاوان و چەند ڕێکخراوێکی دیکە.

 

کەمپەینەکەش لە ڕۆژانی ١٩-٢٠ی مانگ ڕۆژانە لە کاتژمێر ٨ی بەیانی تا کاتژمێر ٨ی ئێوارە لە ئەمنەسورەکەی شاری سلێمانی بەردەوام دەبێت و هەموو جۆرە هاوکارییەک وەردەگرن و دەیگوازنەوە بۆ هاوڵاتیان.

 

"دیاردەی سروشتی تەنها هۆکار نییە بۆ دروستبوونی لافاوی لەوجۆرە"

سۆزان حەملان، سەرۆکی ڕێکخراوی ماهی بۆ پەروەردەی منداڵ، باسی لەوەکرد بە تەنها دیاردەی سروشتی هۆکار نییە بۆ دروستبوونی لافاوی لەوجۆرە، "لە مانگی پایزدا و بەهۆی بارینی ڕێژەیەکی کەم باران بۆ دووەم جارە لافاو لە شاری هەولێر ڕووبدات، ئەمەش ئەوە دەگەیەنێت کە تەنها هۆکارەکە باران نییە، بەڵکو نەبوونی پلانی حکومەتە کە بێئاگان لەوەی ژێرخانی وڵات چی بەسەرهاتووە"، بە پێویستیشی دەزانێت هاوکاری کۆبکرێتەوە بۆ دۆخی نەخوازراوی لەم شێوەیە، دەشڵێت "بۆچی بێپلانی حکومەت بمانگەیەنێتە ئەو ئاستەی پەنا ببەینە بەر کۆکردنەوەی کۆمەک".

 

"دروستکردنی کۆشک و تەلار، بەس نین"  

سەرۆکی ڕێکخراوی ماهی، وتی: "ئەرکی حکومەت و لایەنی پەیوەندیدارە هەستێت بە چاکردنی ئاوەڕۆی شاری هەولێر، لە تەواوی دنیا ئەگەری دروستبوونی کارەساتی سروشتی و لافاو هەیە و زیانی گیانی و مادی لێدەکەوێتەوە، هۆکارەکە بەهێزی لافاوەکەیە نەک خراپی سیستمی ئاوەڕۆ، بەڵام لە هەرێمی کوردستان بە گشتی و شاری هەولێر بە تایبەت خراپی سیستمی ئاوەڕۆ هۆکاری سەرەکی دروستبوونی لافاوەکە بووە".

 

سۆزان باسی لەوەشکرد، وەک ڕێکخراو هەستاون بە کۆکردنەوەی هاوکاری بەڵام کۆکردنەوەی هاوکاری لەم شێوەیە کێشەی هاوڵاتیان چارەسەر ناکات، بەڵکو دەبێت چارەسەرییەکان لە بنچینەوە بکرێن و دووبارە نەبنەوە، "هەرچەند بتوانین قەرەبوونی ماددە بکەینەوە ناتوانین قەرەبووی ڕۆحێک بکەینەوە".

 

"هەولێر بووە بە دوو بەشە و چینی مامناوەندی نەماوە"

لە ئێستادا هاوڵاتیانی شاری هەولێر دابەشبوون بەسەر دوو چیندا، هەژار و دەوڵەمەند چینی مامناوەند نەماوە، سۆزان حەملان لەوبارەیەوە وتی: "چەنێکە دیاردەی سروشتی ڕوودەدەن لە شاری هەولێر تا ئێستا نەمانبینی لە یەکێک لە گەڕەکی دەوڵەمەندەکاندا ڕووبدەن بەڵکو تەنها هەژارەکان ڕووبەڕووی دیاردە سروشتییەکان دەبنەوە".

 

ئاماژەی بەوەشکرد کە ئەرکی حکومەتە نەهێڵێت جیاوازی دروستببێت لە نێوان هاوڵاتیانی شاری هەولێر، "ئەوەندەی گرنگی بە کۆشک و تەلار دەدات، گرنگی بە گەڕەکە کۆن و هەژارەکان بدات، یاخود لەوکاتەی هەڵدەستن بە دروستکردنی گەڕەکێکی نوێ بە شێوەیەکی ئەکادییمیانە دروستیبکەن نەک بێ بنەما و پلان دروستیبکەن، ئەو دۆخە ڕوونادات".

 

ت.پ