ئاسودە محەمەد

 

 شارەزوور- سەناریا کەمال خوێندکاری قۆناغی دوانزەی وێژەییە لە ئامادەی ئاسۆی کچان لەقەزای سەیدسادق لە دەڤەری شارەزوور، خاوەن پێداویستی تایبەتە و نابینایە لە وەرگرتنەوەی ئەنجامەکانی کۆتای ساڵدا توانی کۆنمرەی ٩٨.١٦ بەدەستبهێنێت بەمەش بووە سێهەمی هەرێم ویەکەمی سنوری پەروەردەی قەزای سەیدسادق.

سەناریا لە سه‌ر هەوڵ و کۆششەکانی باسی لەوە کرد کە لەدوای تەواوبوونی  قۆناغی یانزەوە دەستیکردووە بەهەوڵدان وکۆشش بۆقۆناغی دوانزە و دەڵێت: " قۆناغی دوانزە هەستیارە و بۆهەموو خوێندکارێک ترس ودڵەڕاوکێی هەیە چونکە بڕیاری لەسەر ئەو پیشەیە دەدات کە لە داهاتوودا دەیکەیت بەڵام پێویستە خوێنده‌کانت ئازایانە بەسەریدا زاڵبیت ودوای خەون وئامانجی خۆت بکەویت و ڕێگا نەدات هیچ شتێک ببێتە کۆسپ لە بەردەمی."

سەناریا ئاماژەی بەوەش کرد کە لە قۆناغی دوانزەدا زۆر گرنگە خوێندکار پلان و ئامانجی هەبێت بۆئەوەی ئەنجامێکی باش بەدەستبهێنێت: " هەوڵدان و کۆشش کردن دەبێت پلانی بۆدابنرێت چونکە زۆرگرنگە پیشەی داهاتووت دیاری دەکات هەوڵ وماندووبوونی دەوێت، من ڕۆژانە حەڤدە کاتژمێر کۆششم کردووە لەڕێگەی تۆمارکەرێکی دەنگیەوە کەتەواوی وانەکانم بەدەنگ تێیدا تۆمارکراوە و زۆر یارمەتیدەر بوو لە گەیشتن بە سەرکەوتنەکانم."

سەناریا ماوەی هەشت ساڵە بەم ڕیکۆردەرە دەخوێنێت و پێشتریش لەڕێگەی کاسێتەوە وانەکانی دەخوێند، سەناریا  لەقۆناغی یەکەمەوە تا دوانزەهەم بەپلەی یەکەم دەرچووە و هەروەها دەڵێت: " پێش ڕاگەیاندنی ئەنجامەکانیش خۆم پێشبینی ئەنجامەکەم کردبوو و چونکە هەوڵی تەواویم بۆیدابوو و کۆششێکی باشم لە سەرجەم وانەکاندا کردبوو."

سەناریا وەک بەشێک لە ئامجەکانی باسی لەوە کرد کە دەیەوێت لە کۆلێژی زمانی ئینگلیزی درێژە بە خوێندن بدات، و دەڵێت: "  دەمەوێت لە کۆلێژی زمانی ئینگلیزی بخوێنم چونکە خۆمم لەو بوارەیا دۆزیوەتەوە و لەگەڵ ئەدەبیاتی ئینگلیزی گونجاوم و هەر کەسێکی تریش پێویستە خۆی بناسێت و ئامانجەکانی بدۆزێتەوە."

لە کۆتایشدا سەناریا باسی لەوە کرد کە خێزانەکان پێویستە پاڵپشتی کچەکانیان بکەن تا هونەر و بەهرەی خۆیان بدۆزنەوە و بتوانن ئامانجەکانیان بەدەستبهێنن و خزمەت بە کۆمەڵگە بکەن، لە دیدی سەناریا نابینا بوونی زیاتر لەوەی بوبێتە ڕێگر لە بەردەم خەونەکانیدا بووەتە پاڵنەری تا دەستکەوتی زیاتر بۆ ژیانی بەدەستبهێنێت، یارمەتیدەری بووە کە چواردەورەکەی بناسێت و تێڕامانی قوڵی بۆ ژیان هەبێت.