ئەسما فەتحی

 

قاهیرە-هاوسەرگیری لە تەمەنی زوودا دیاردەیەکی بەربڵاوە لە میسر، بەتایبەتی لە گوندەکان، کە باوەڕ وایە کاتێک منداڵێکی کچ دەگاتە تەمەنێکی دیاریکراو، دەبێت هاوسەرگیری بکات، یان خۆی و خێزانەکەی دووردەخرێنەوە.

 

یەکێک لەو ژنە گەنجانە ئەو پەراوێزخستن و ئازارانەی دەربڕی کە بە منداڵی هاوسەرگیریی کردووە، وتی: لە تەمەنی ١٤ ساڵیدا هاوسەرگیریم کرد و مافی ئەوەم نەبوو خۆم هاوژینێک هەڵبژێرم، خێزانەکانمان بڕیاریان دا هاوسەرگیریمان پێبکەن، چونکە ئێمە خزمین و ئێستا چوار منداڵم هەیە و هەست دەکەم ژیانم وێران بووە.

 

بۆ ڕوونکردنەوەی دیاردەی هاوسەرگیری منداڵان لە گوندەکانی میسر، واقیعی ژیانی ژنان و منداڵانی کچ لەو گوندانە و ئاڵۆزییەکانی ئەم جۆرە هاوسەرگیرییە و هۆکارەکانی بەردەوامبوونی، ئاژانسەکەمان ڕاپرسییەکی ئەنجامدا کە تیایدا ژمارەیەک ژن بەشدارییان تێدا کرد و ئەوەیان پشتڕاستکردەوە کە ژن بڕیاردەری ئەم ڕێککەوتنە نییە و خێزانەکەی بڕیار لەسەر چارەنووسی دەدەن بە بیانووی ئەوەی تەمەنی مافی ئەوەی پێدەدات هاوسەرگیری بکات.

 

ئاماژەیان بەوەکرد، کۆمەڵگە چەندین خەیاڵی لە مێشکی منداڵاندا چاندووە، ئەەم هۆکارە بۆ بەردەوامی ئەم جۆرە هاوسەرگیرییە.

 

"هەندێک تا ئێستا وەک پاکیزەیی و ڕووپۆشێک بۆ منداڵی کچی دەبینن"

نەوال عەلی، تەمەن ٣٢ ساڵ، ئاماژەی بەوەکرد، ئەو کچی خێزانێکە دایک و باوکی بڕیاریان دا هاوسەرگیری پێبکەن کاتێک کە منداڵ بوو پێیان وت "هاوسەرگیری داپۆشینە بۆ کچەکە" بۆ ئەوەی واز لە خوێندن بهێنێت کاتێک لە قوتابخانەی ناوەندی بوو، بۆ ماوەی چەند ساڵێکە بەهۆی دووگیانی و منداڵبوونەوە لە تەمەنێکی زوودا تووشی کێشەی تەندروستی یەک لەدوای یەک بووە و هەست دەکات کە تەمەنی کۆتایی هاتووە، دوای ئەوەی منداڵەکانی گەورە بوون و چیتر هیچ ئەرکێکی نییە بیکات، ئەمەش ئەو شتەیە کە خێزانەکەی پلانیان بۆ دانابوو.

 

وتی: کاتێک هاوپۆلەکانم دەبینم، هەست بە دڵتەنگی دەکەم دەربارەی ئەوەی کە کێم، هەرچەندە باری دارایی باشە و کوڕ و کچم هەیە، بەڵام شتێک هەیە کە کەمی هەیە و زۆر جار دەڵێم ئەگەر خوێندنم تەواو کردبایە لە شوێنێکی باشتردا دەبووم، هەموو ئەوەی ئەمڕۆ ئازار دەدات بەهۆی خواستی خێزانەکەمەوەیە بۆ پاراستنی موڵکەکانیان.

 

ئەگەر دایک و باوکان ئەو هاوسەرگیرییە ڕەتبکەنەوە وەک لادان لە نەریت تەماشا دەکرێت

نادا سەڵاح، پزیشکی دەروونی وتی: هاوسەرگیری لە تەمەنی زوودا دیاردەیەکی بەربڵاوە لە شارەکانی میسردا، بەهۆی ئەو باوەڕە بەربڵاوەی کە منداڵانی کچ کاتێک دەگەنە تەمەنێکی دیاریکراو دەبێت هاوسەرگیری بکەن وەک شتێکی ئاساییە بۆ دایک و باوکیان و لادان لێی پێشێلکردنی نەریتەکان دەبێت و لەوانەیە لەهەندێک گونددا ڕوانگەیەکی خراپی  بۆ کچەکە و خێزانەکەی هەبێت.

 

ئاماژەی بەوەد، زۆرێک لە خێزانەکان هاوسەرگیری لە تەمەنی زوودا بە "پاراستن و پاکیزەیی" دەبینن، وتی: نابێت بابەتەکە بەو شێوەیە بڕوات، چونکە منداڵانی کچ لە مافی هەڵبژاردن و بیرکردنەوە لە داهاتووی خۆیان و مافی خوێندنیان بێبەش دەکات، ژنێکی خوێندەوار دەتوانێت داهاتوویەکی باشتر بۆ خۆی بونیاد بنێت و لە تەمەنی گونجاودا خێزانێکی یەکگرتوو پێکبهێنێت و منداڵەکانی بەخێو بکات بۆ خزمەتکردنی کۆمەڵگە لە جیاتی ئەوەی لە منداڵیدا هاوسەرگیری بکات و بەرپرسیارێتی خێزان و منداڵەکانی بگرێتە ئەستۆ کە هیچ ئاگادارییەکانی دەربارەی ئەوە نییە.

 

"هاوسەرگیری منداڵان زیانی تەندروستی و کۆمەڵایەتی هەیە"

نەوال عادل، کە تەمەنی ٤٠ ساڵە، لە منداڵیدا هاوسەرگیری کردووە باوەڕی وایە کە هاوسەرگیری "ساڵی ژیانە"، بەڵام ئەوەی لە کاتی لەدایکبوونی کچەزای یەکەمیدا ڕوویدا زۆر دڕندانە بوو و خەریک بوو کۆتایی بە ژیانی کچەکەی بێت، وتی: لە نەخۆشخانە پێیان وتم کە کچەکەم هێشتا زۆر گەنجە بۆ ئەوەی منداڵی هەبێت، بارودۆخەکەی زۆر مەترسیدارە و کۆرپەکەی بۆ ماوەیەک لە بەشی چاودیری مایەوە تا ئەو ئاستەی کە هیوای ڕزگاربوونمان لەدەستدا، لەو کاتەوە ئامۆژگاری ژنان دەکەم بەزۆر هاوسەرگیری نبە کچەکانیان نەکەن، بەتایبەتی لە تەمەنێکی زوودا.