تەوار پێنجوێنی

ڕاپەڕین- دەوڵەتی تورکیا بەردەوام ئۆپەراسیۆن بۆ سەر خاکی باشوری کوردستان دەستپێدەکات و بۆردومانی ناوچە سنورییەکان و گوندەکان دەکات، زیاتر لە ٨ مانگیشە هێرشەکانی بۆ سەر هەرێمی بادینان، زاپ، مەتینا و ئاڤاشین چڕکردووەتەوە، بەپێی ئەو ئامارانەی کە هێزی پاراستی گەل بڵاویکردووەتەوە، زیاتر لە ٣٢٣ جار چەکی کیمیایی بەکارهاتووە.

 

بەپێی ڕاپۆرتێکی ڕێکخراوی تیمی ئاشتیپارێزی کرستیان-سی پی تی لە هەرێمی کوردستان کە مانگی تەمموز/٧ بڵاویکردەوە، لە ئەنجامی هێرشەکانی دەوڵەتی تورکیا لە ماوەی پێنج ساڵدا ١٠٣ هاوڵاتی شەهید بوون و ١٤٨ گوند چۆڵکراون و ٥٠٠ گوندیش هەڕەشەی چۆڵکردنیان لەسەربووە.

 

ژنانی گەنجی ڕانیە دەربارەی هێرشەکانی دەوڵەتی تورکیا بۆ ئاژانسی نوژنها دوان و باسیان لەوەکرد کە دەوڵەتی تورکیا خاکی کوردان بۆردومان دەکات و داگیرکاری دەکات، ئەوەشی زیانی بەردەکەوێت گوند و هاوڵاتیانی مەدەنین.

 

"دەسەڵاتداران باکیان بە هاوڵاتی نییە و بێدەنگن لە ئاست بۆردومانەکان"

هاوژین محەمەد، دانیشتووی شاری ڕانیەیە، دەربارەی هێرشەکانی دەوڵەتی تورکیا دەڵێت: ناخۆشە کاتێک سنور و خاکێکت هەیە، بەڵام دەوڵەتێکی دیکە تۆپبارانت دەکات، بەمەش خەڵکی هەژار و گەل دەبنە قوربانی، بەڵام ئەوانەی لە سەرەوەن و دەسەڵاتدارن باکیان بە گەل نییە و بیدەنگن، ئەگەر بێدەنگ نەبوونایە میللەتیش نەدەبووە قوربانی هێرشەکانی دەوڵەتی تورکیا، بەڵام دیارە کە ڕێککەوتنیان هەیە لەگەڵ ئەو دەوڵەتانەدا".

 

هاوژین باس لە زیانی بۆردومانەکان دەکات بۆ سەر گوندەکان کە بەهۆیەوە چۆڵدەکرێن و زیان بە گوندنشینان دەکات، "ئێمە پێویستمان بە گوندەکانە بۆ بەرهەمی میوە و ئاژەڵی، بەڵام بەهۆی بۆردومانەوە گوندەکان چۆڵدەکرێن و زیان بە هەمووان دەگات لە نەبوونی گونددا".

 

خاکەکەمان بەپیتە و موڵکی کوردانە

ڕوناز ئیسماعیل، ژنێکی گەنجی دیکەیە و دەڵێت خاکەکەی ئێمە بە پیتە بۆیە هێرش دەکەنە سەر خاکەکەمان، ئەمەشی بۆ نابەرپرسی حکومەتی هەرێم گەڕاندەوە، "دەبێت حکومەتی هەرێم بێتە دەنگ و ڕێگەنەدات،، خاکەکەمان بەپیتە و خاکی خۆمانە کوردی تێدا دەژی، ئێمە کوردین، بەڵام بە سیاسەت بیرکردنەوەی خراپیان دروستکردووە و تورکەکان وادەزانن ئێمە دوژمنیانین بەڵام ئێمە دوژمنی کەس نین".

 

ڕوناز وتیشی بۆردومانەکان زیانی بۆ گوندەکان هەیە و وایلێهاتووە کە خەڵک گوند و شاخەکان بەجێدەهێڵن لە ترسی بۆردومان، "چونکە زیانی بۆ خەڵکی ئاسایی هەیە".

ت.پ