بەهاران لاهیب

 

کابول- ٢ی تەمموز، وەزارەتی فەرمان بە چاکە و قەدەغەکردنی خراپەی تاڵیبان نامەیەکی لە میدیاکانی ئەفغانستان بڵاوکردەوە، کە واژۆی هەیبەتوڵا ئاخوندزادە، ڕێبەری توندڕەوی تاڵیبانی لەسەرە و بۆ هەموو ئارایشتگاکانی ژنان نێردراوە، تیایدا وادەی دیاری کردووە بۆ کۆتایی هێنان بە کارەکانیان و هەڵوەشاندنەوەی سەرجەم مۆڵەت و گرێبەستی ئارایشتگای ژنان، ئەمەش باری ئابووری ئەو ژنانە خراپتر دەکات کە لە ئارایشتگاکاندا کار دەکەن.

 

ش.س. خاوەنی یەکێک لە ئارایشتگاکانی کابولە و ساڵێک لەمەوبەر باوکی لەدەستدا کە تاکە دابینکەری بژێوی خێزانەکەی بوو، دوای باوکی ش.س. بەرپرسیاری بەخێوکردنی خوشک و براکانییەتی و بە داهاتە کەمەکانی ئارایشتگاکەی پێداویستیەکانیان بۆ دابین دەکات.

 

ش.س دەڵێت: باوەڕم نەدەکرد تاڵیبان ڕێگەمان پێنەدات کار بکەین تا ژنانی وەزارەتی وەزارەتی فەرمان بە چاکە و قەدەغەکردنی خراپەی تاڵیبان هاتنە ئارایشتگاکەم و ڕایانگەیاند کە دەبێت هەموو کەلوپەلەکانی ئارایشتگاکە کۆبکەمەوە، چونکە ماکیاژ لە ئیسلامدا قەدەغەیە و دوا مۆڵەتیان بۆ دیاری کردین کە کۆتایی مانگی تەمموزە.

 

ئەمە لە کاتێکدایە وەک ش.س. دەیان ژن هەن کە بە داهاتی ئارایشتگاکان دەژین و بەم بڕیارەی تاڵیبانیش سەرچاوەی داهاتیان لەدەستداوە.

 

لەم ئارایشتگایەدا ش.س. چەندین فێرخوازی لەلا بوو، چونکە لەلایەن تاڵیبانەوە ڕێگەیان پێنەدەدرا لە فەرمانگە کار بکەن، بۆیە بەگوێرەی قسەی ژنان فێربوونی کارێک و هەڵهاتن لە چوار دیواری ماڵ هاتنە ئارایشتگاکە، بەڵام تاڵیبان ئەم بوارەی کاری ژنانیشی قەدەغە کرد و تەنانەت ڕێگەی بە ژنان نادات هەناسە بدەن.

 

ش.س. لە کۆتایی قسەکانیدا وتی: بە بیستنی ئەم هەواڵە تووشی شۆک بووم، بەڵام زۆرینەی ئارایشتگاکان هەوڵدەدەن شوێنێک بدۆزنەوە کە لە چاوی تاڵیبان دووربێت، تا بەردەوام بن لە کارەکانیان.