میهرەبان سەلام کاکەیی

 

هەڵەبجە- پاش ئەوەی دادگای باڵای فیدڕاڵی عێراق یاسای  ژمارە ١٥ی ساڵی ٢٠٠٨ (یاسای باری كەسێتیی ژمارە ١٨٨ی ساڵی ١٩٥٩ی هەمواركراو) تێیدا كاركردنی بە بڕگەی پێنجەم لە ماددەی ٤٠ی هەمان یاسای عێراقی ڕاگرتووە و لە جێگەیدا بڕگەكەی بەم شێوەیە داڕشتووەتەوە: (ئەگەر هاوسەر (پیاو) ژنی دووەمی هێنا، ژنی یەكەم مافی هەیە داوای جیابوونەوە بكات)، بە نادەستووری لە قەڵەمدا و لە یاسا دەستورییەکەشدا ڕێگری لە جیابوونەوەی ژنی یەکەم دەکرێت، لەلایەن چالاکوانانی باشووری کوردستانەوە ڕووبەڕووی هەڵوێستی توند بووەوە و بڕیارەکە بە پێشێلکاری مافی ژنان دادەنێن و جەختدەکەنەوە کە عێراق بە ئەقڵێکی پیاوسالارانە یاساکانی دادەنێت.

 

"بڕیارەکە ئەجێندای سیاسی لەپشتە"

هانا شوان، به‌رپرسی به‌شی به‌ره‌نگاربوونه‌وه‌ی توندوتیژ‌ی له‌ ڕێكخراوی گەشەپێدانی مرۆیی، وتی : لە پاش دەرچوونی بڕیارەکە چەندین کۆبوونەوەمان کردووە و هەموان کۆکین لەسەر ئەوەی ئەم بڕیارە ئەجیندای سیاسی لە پشتە و مەبەستیانە نائارامی کۆمەڵایەتی لە هەرێمی کوردستاندا دروستبکرێت و دژایەتی لەنێوان ڕەگەز و بەشە جیاوازەکانی کۆمەڵگەدا دروست ببێت، وە ئەگەر سەریش نەگرێت بۆ ئەوەیە هاوڵاتیان نیگەران ببن.

 

لە سەرجەم تێکستە یاساییەکان زوڵم لە ژنان کراوە

هانا شوان ئاماژە بەوە دەدات لە ناو تێکستە یاساییەکاندا زوڵم لە ژنان دەکرێت، "لە نەفەقە و منداڵ وەرگرتنەوە و جیابوونەوە و نیشتەجێبوون و دەیان کێشەی دیکە دەکەونە بەردەم ژنان، ئامارەکانیش ئاماژە بەوە دەدەن کە بەهۆی ناسەقامگیری و نائارامی باری سیاسی و کۆمەڵایەتی و ئابوورییەوە ڕێژەی فرە ژنی بەرز بووەتەوە، بڕیارەکەی دادگاش بۆ پشتیوانی فرە ژنییە، بەڵام هەموومان دژی ئەو بڕیارەین و بە هەوڵی هەمووان ڕێگریی لە یاساکە دەکەین".

 

ئەم بڕیارە ئەگەر لە حکومەتی عێراقدا جێبەجێبکرێت، لە هەرێم جێبەجێ ناکرێت

چیا یاسین، چالاكوانی بواری مافه‌كانی ژنان، باسی لەوەکرد، ئەم یاسایە دەنگۆیەکی زۆری دروستکرد، چونکە شەرع پێشتر ڕێگەی بە فرە ژنی داوە و دوای ئەوەش بە یاسایی کرا، وتیشی: ئەوەی ئێستا لە دادگای فیدڕاڵیدا دەگوزەرێت تەنها دەنگۆیە و لە پلانماندایە بۆ ئەوکاتەی کۆبوونەوە دەکرێت لەسەر بڕیارەکە، بەپێی یاسا وەڵام بدەینەوە، چونکە ناکرێت بڕیاری ناو هەرێم و عێراق تێکەڵ بکرێت، ئێمە کۆدەنگی دروستدەکەین و یەک هەڵوێستیمان یەکدەخەین، بۆیە ناتوانن لە کوردستان ئەو یاسایە بە ئاسانی تێبپەڕێت.