شەهبا

 

٧ ساڵ بەسەر کۆچکردنی خەڵکی عەفریندا تێدەپەڕێت لە ماوەی ئەم ساڵانەی کۆچکردندا، خەڵکەکە لە هەموو بارودۆخێکی سەختی ژیاندا ژیاون و تا ئێستا بە ئیرادەی خۆیان بەردەوامن لە بەرخۆدان لە شەهبا، لە لایەکەوە حکومەتی شام بەردەوامە لە گەمارۆدانی ناوچەکە و لە لایەکی دیکەوە دەوڵەتی تورکیا هەموو ڕۆژێک هێرش دەکاتە سەر ناوچەکە، ئامانجی ئەم هێرشانە لاوازکردنی بەرخۆدانی گەلی ناوچەکەیە و دووبارە کردنەوەی دەرگای کۆچکردنە، خەڵکی هەرێمەکە ئاماژەیان بەوەکرد، تا گەڕانەوەی عەفرین و کۆتایی هاتنی داگیرکاریی لە تێکۆشان و بەرخۆداندا دەبن.

 

ژنانی عەفرین کە بەرەو ناوچەکانی شەهبا کۆچیان کردووە و بۆ ژیان تێدەکۆشن قسەیان بۆ ئاژانسەکەمان کرد.

 

"تا گەڕانەوەی عەفرین بەرخۆدانمان لە شەهبا بەردەوام دەبێت"

ژنێک بە ناوی ئەمینە شێخۆ باسی سەختی ژیانی خۆی لە شەهبا کرد لە گەمارۆ و هێرشەکاندا و وتی: ٧ ساڵە لە شوێنەکانمان ئاوارە بووین و لێرە خەبات دەکەین بۆ ژیان، سەرەڕای کۆچکردن لە شارەکەمانەوە، ئێمە دەورە دراوین و گەمارۆ دراوین، زۆرجار بێ کارەبا دەمێنینەوە، لە ژیانێکی زۆر سەختدا دەژین، بەڵام هێشتا خەبات دەکەین، لە جیاتی ئەوەی یارمەتیمان بدەن، ئەوان گەمارۆمان دەدەن و هەموو ڕۆژێک هێرشمان دەکەنە سەر، تا گەڕانەوەی عەفرین بەرخۆدانمان لە شەهبا بەردەوام دەبێت.

 

"گەمارۆو هێرشەکان ناتوانن بەرخۆدان تێکبشکێنن"

فاتمە محەمەد ئاماژەی بەوەکرد، هێرشەکان و گەمارۆ کاریگەرییان لەسەر بەرخۆدانیان نەبووە و ئیرادەیان لاواز ناکات، وتیشی: هەموو ڕۆژێک چاوەڕێی گەڕانەوەی عەفرین دەکەین و چاوەڕێی زانیاری دەکەین دەربارەی سەرکەوتن، هیچ هێرشێکی دوژمن کاریگەری نابێت لەسەر بەرخۆدانمان و ئیرادەمان لاواز ناکات، تا کۆتایی لە شەهبا بەرخۆدان دەکەین، چونکە ئەم بەرخۆدانە مسۆگەری گەڕانەوەی عەفرین دەکات، ٧ ساڵە لە تەنگانەدا دەژین، بەڵام هەرگیز دەستبەرداری بەرخۆدانەکەمان نابین.