شیرین ساڵح

 

سلێمانی-ئاینی کاکەیی یەکێکە لە ئاینە دێرینەکانی کوردەواری، بە پێی قسەی مێژوونووسان سەرهەڵدانی ئەم ئاینە لە ژێر ناوەکانی "ئەهلی هەق، یارسان و کاکەیی" دەرکەوتووە تایبەت نییە بە ناوچە و هۆزێک، کاکەییەکان لە ناوچەکانی باشوور و ڕۆژهەڵاتی کوردستان نیشتەجێ بوون، لە ڕۆژهەڵاتی کوردستان بە یارسانەکان و لە باشووری کوردستان بە کاکەیی ناودەبرێن.

 

ئاینی کاکەیی هەمیشە بەر هێرشی گروپە ئاینگەرا توندڕەوەکان کەوتووە و چەندین جار تووشی کۆمەڵکوژی و ئاوارەبوون و ڕووخاندنی مەزارگە ئاینییەکانیان بوونەتەوە، سەرەڕای ئەو هێرشانەی لەلایەن گروپ و تونڕەوەکانەوە دەکرێتە سەر ئەم ئاینە، بەڵام هەر لە کۆنەوە تا ئێستا نەوە دوای نەوە ماوەتەوە و پاراستویانە، لەم ئاینەدا گرنگییەکی زۆر بە ژینگە و پاراستنی دەدەرێت و بە پیرۆزی دەزانن، زاراوەی سەرەکیان ماچۆیە، بەڵام بەهۆی پرۆسەی ڕاگواستن و جینۆسایدی کولتوورییەوە، زۆربەی گەنجەکانیان لە ئێستادا ناتوانن بەو زاراوەیە قسە بکەن.

 

کاکەییەکان مێژوویەکی پڕ لە ئازاریان هەیە، هەر کەسێک مێژووی کاکەییەکانی نوسیبێتەوە، هەوڵی گۆڕینی مێژووەکەیانی داوە، موزیک لای کاکەییەکان گرنگییەکی خۆی هەیە و هیچ مەراسیمێکی ئاینیان بە بێ موزیک و لێدانی تەمبور بەڕی ناکەن و تەمبور یەکێکە لە ئامێرە موزیکییە پیرۆزەکان لای کاکەییەکان.

 

"ژنان ڕۆڵی گرنگیان هەبووە لە پاراستنی ئاینی کاکەییەکان"

نازدار قودرەت، کاکەییەکە و باس لە توندوتیژییەکانی سەر ئاینەکەیان دەکات و دەڵێت: گومانی تێدا نییە ئێمە وەکو کاکەییەکان و ئاینەکەمان بە درێژایی مێژوو توندوتیژی زۆرمان بەرامبەر کراوە، تا ئێستاش ئەو هەوڵانە بەردەوامە بۆ لەناوبردنی ناسنامە ئاینییەکەمان، بێگومان ئەو ئەرکە سەرەکییەی ژنانی ئێمە گێڕاویانە هۆکارێک بووە بۆ ئەوەی ئاینەکەمان بمێنێتەوە، چونکە ئاینەکەمان کۆنە و  ژنانیش ڕۆڵێکی سەرەکیان هەبووە کە تا ئیستا ئەو توندوتیژیانە کار نەکاتە سەرمان، بە هێشتنەوەی بیر و باوەڕیان و باسکردنی بۆ نەوەکانی دوای خۆیان. هەروەها فرە ئاینی لەناو گەلی کوردا نیشانەی دەوڵەمەندی ئەو گەلە دەردەخات کە مێژوویەکی کۆن و دەوڵەمەندمان هەیە و هەر لە کۆنەوە ئاین و زمان و مێژوومان هەبووە. 

 

"بۆ مانەوەی ئاینەکەمان چەندین جار ئاوارەییمان بینیوە"

نازدار قودرەت ڕوونی کردەوە، بە درێژایی مێژوو هەوڵی قڕکردن و لەناوبردنی ئاینی ئەم گەلانە دراوە، لەبەرئەوەی گەلی کورد لە هەر چوار لاوە دوژمن و نەیاری هەیە، بۆیە بە هەموو شێوەیەک پەنا دەبەنە بەر قڕکردنمان، لەناویشیاندا دەست بۆ ئاین دەبەن، چونکە مێژووی کۆنی نەتەوەکەمانە، ئێمە بۆ مانەوەی خۆمان وەکو کاکەییەکان نەهامەتی زۆر، بەخشینی گیانی خەڵکەکەمان، ئاوارەبوون، ڕوخاندنی شوێنە ئاینییەکانمان، گەڵتەکردن بە بیروباوەڕمان و دژایەتی زۆرمان بینیوە تا گەشتووین بەم قۆناغە، هەمیشە شوێنمان گۆڕیوە بۆ ئەوەی ئاینەکەمان بپارێزین.

 

وتیشی: لە ڕابردووەوە تا ئێشتاش زۆربەی کاکەییەکان ئاینەکەیان دەشارنەوە بۆ ئەوەی لەلایەن کۆمەڵگەوە ڕووبەڕووی توندوتیژی و قسەی نەشیاو نەبنەوە و نەکوژرێن، چونکە ئەو کەسانەی توندوتیژییان بەرامبەرمان کردووە دەسەڵاتیان زۆر بووە یان ژمارەیان زۆرتر بووە لە ئێمە، بۆیە ئێمەش هەستمان بە ترس کردووە، ئێستاش دەمانەوێت بابەتەکە بوروژێنین، چونکە ئێستا سەردەمی یاسایە و دەتوانین مافەکانمان بەدەستبهێنین، دەتوانین ناسنامەی خۆمان دیاری بکەین و شانازی پێوە بکەین.