ناوەندی هەواڵ

 

ژمارەی گیان لەدەستدان بەهۆی بوومەلەرزەکەی کەناری ڕۆژئاوای ژاپۆنەوە کە ١ی کانوونی دووەمی ٢٠٢٤ بە پلەی ٧.٦ پلەی ڕێختەر روویدا، گەیشتە ٧٧ کەس و سەدان برینداریش هەن، تیمەکانی فریاکەوتن بەردەوامن لە ڕزگارکردنی ئەو کەسانەی لەژێر دارو پەردوو وێرانەکانی ماڵەکاندا گیریان خواردووە.

 

ماسوهیرۆ ئیزومیە، سەرۆکی شارەوانی سوزو وتی: کاربەدەستان هیوادارن لە ماوەی سێ ڕۆژدا بریندارەکان و ئەوانەی لەژێر داروپەردوودا ماونەتەوە ڕزگار بکەن و ئەگەری ڕزگاربوونیان زیاترە.

 

لە یەکەم ڕۆژی بوومەلەرزەکەوە نیمچە دوورگەی نۆتۆ لە پارێزگای ئیشیکاوا زیاتر لە ٦٠٠ بوومەلەرزەی لێکەوتەوە، ئەمەش ترسی ڕووخانی زەوی و زیانی گەورەتری ژێرخانی زەوی بەرزکردەوە، لە کاتێکدا ڕێژەی زیانەکان هێشتا ڕوون نییە و ڕانەگەیەندراوە.

 

زیاتر لە ٣٣ هەزار کەس لە ماڵەکانیان ئاوارەبوون لەو ناوچانەی بەهۆی بوومەلەرزەکەوە زیانیان بەرکەوتووە دوای ئەوەی ماڵەکانیان وێران بوون و زیاتر لە ١٠٠ هەزار ماڵ ئاویان نەماوەو نزیکەی ٣٠ هەزار ماڵ لە پارێزگای ئیشیکاوا بێ کارەبا ماونەتەوە.