ناوەندی هەواڵ

 

چەوساندنەوەی ژنانی کورد لەلایەن ڕژێمی ئێرانەوە بە مەبەستی بێدەنگکردنیان بەردەوامە ماڵپەری دەنگی دەستگیرکراوەکانی کورد و ئێران لەبارەی سزادانی ژنێکی کورد لە ڕۆژهەڵاتی کوردستان لە لایەن ڕژێمی ئێرانەوە ڕایگەیاند. ئیلهام نادری مونفەرێدی تەمەن ٣٢ ساڵ لە نۆدشەی سەر بە هەورامانی ڕۆژهەڵاتی کوردستان و دانیشتووی شاری مەریوان لەلایەن دادگای شۆڕشی مەریوان سزای دوو ساڵ زیندانییکردنی بەسەردا سەپێندرا.

 

ئاماژە بەوەشکراوە، ئیلهام نادری مونفەرێد لە کاتی شەڕی ١٢ ڕۆژەی نێوان ئێران و ئیسرائیل، بەهۆی بڵاوکردنەوەی ستۆرییەک لەو بارەوە لە تۆڕی کۆمەڵایەتی لەلایەن ئیدارەی ئیتلاعاتی مەریوان بانگهێشت کرا و لە کاتی لێپرسینەوە هەڕەشەی لێکرا، دواتر بە شێوەی کاتی ئازاد کراو ئێستا بەو هۆیەوە سزا دراوە.

 

 پێشتر سەعید مونتەزەر وتەبێژی پۆلیسی ئێران ڕایگەیاندبوو، ئێران لە جەنگی ١٢ ڕۆژەی وڵاتەکەی لەگەڵ ئیسرائیل، ٢١ هەزار کەسیان دەستگیر کردووە و لێکۆڵینەوەیان لە پێنج هەزار و ٧٠٠ دۆسێیەى ئەلیکترۆنی کردووە.

 

بەپێی هەواڵی ڕێکخراوەکانی مافی مرۆڤی کوردستان و ئێران، لە ماوەی ١١ مانگی ساڵی ٢٠٢٤ـدا ١٣٠ چالاکوانی ژن دەستبەسەر کراون، ٢٣٢ ژنی دیكەش زیندانیی کراون، هەروەها ٤١ ژنیش لەسێدارە دراون.