ناوەندی هەواڵ

 

کۆڵبەرنیوز سەبارەت بە شەپۆلی سزاکانی دژ بە چالاکوانانی کورد لە شاری مهابادی ڕۆژهەڵاتی کوردستان زانیاری بڵاو کردەوەو تێیدا هاتووە: لقی یەکەمی دادگای شۆڕشی مهاباد لە ڕۆژهەڵاتی کوردستان بە سەرۆکایەتیی داوەر ئەحەد سیامی، سزای ٧٦ ساڵ و حەوت مانگ زیندانیی بەسەر ١٦ دانیشتووی ئەو شارەدا سەپاند.

 

تۆمەتەکانی ئاڕاستەکراو بەرامبەر ئەو کەسانە بریتین لە بانگەشە دژ بە ڕژێمی ئێران و چالاکی لە تۆڕە کۆمەڵایەتییەکان لە سوودی حزبە کوردییەکان بووە.

 

ئاماژە بەوە کراوە، بەپێی بڕیاری دادگا، عەبدوڵا هۆشمەند و عەبدولڕەحمان قووە هەرکامیان بە حەوت ساڵ و مانگێک زیندانی سزادراون، هەروەها ١٢ کەسی دیکەیان لەوانە عەبدوڵا قووە، قادر خەرامانفەر، جەلال سەدەفی، عەلی مەعروفی، ئارام مەبزولە، یوسف تال، ڕێبوار ڕەسوڵی، ئەیوب ڕەسوڵی، عوسمان جیهانیفەر، ڕەحمان دانا، سالار شەمسبورھان و زانیار سەیدئەحمەدی، هەر یەکەیان بە پێنج ساڵ و نازەنین ئەلیاسی بە دوو ساڵ و کەمال مەسعوودی بە پێنج مانگ زیندانیی سزا دراون.

ئەم ١٦ کەسە لە نێوان مانگەکانی تشرینی یەکەم و دووەمی ٢٠٢٤ لەلایەن ئیدارەی ئیتلاعاتی مهابادەوە دەستبەسەر کرابوون و دواتر بۆ گرتووخانەی ورمێ گواسترابوونەوە.

 

ڕاپۆرتەکە جەخت لەوەش دەکاتەوە کە تۆمەتباران لە تەواوی ماوەی دەستبەسەرکردنیاندا لە مافی هەبوونی پارێزەر، پەیوەندیی تەلەفۆنی و چاوپێکەوتن لەگەڵ بنەماڵەکانیان بێبەش کرابوون.