ئاسودە محەمەد

شارەزوور- شنیار هونەر ئەو ژنە ٢١ ساڵەی لەلایەن هاوژینەکەیەوە سوتێنرا دوایی پێنج ڕۆژ مانەوەی لە نەخۆشخانەی ئیمێرجنسی سلێمانی کۆچی دواییکرد و لە گۆڕستانی نوێی سەیدسادق بەخاکسپێردرا.

 

هەر ئەمڕۆ شاندێک لە ژنانی تەڤگەری ئازادی کۆمەڵگەی کوردستان و ڕێکخراوی ژنانی ئازادی کوردستان سەردانی  پرسە و گۆڕی شنیار هونەریان کرد لە شارۆچکەی سەیدسادق.

 

سارا ڕەزا، ئەندامی تەڤگەری ئازادی لە لێدوانێکیدا بۆ نوژنها ئاماژەی بەوەدا مەبەستی بەشدارییەکەیان لە پرسەی شنیار هونەر پاڵپشتی کردنی کەیسی شنیارە و سورن لەسەر ئەوەی تاکۆتایی لەگەڵ کەیسەکە بڕۆن، وتیشی: نیگەرانین لەوەی کێشەی شنیار بەم کارەساتە گەشتووە، شنیار چەندین جار تۆراوە لە ترسی وشەی بێوەژن "بێ هاوژین" گەڕاوەتەوە لای هاوسەرەکەی.

 

سارا ڕەزا لە درێژەی قسەکانیدا وتی: جیابوونەوە باشترە لە ژیانکردن لەگەڵ پیاوێکدا ستەمی بەرامبەر بکات، داواکاریشە کەیسەکە بە سوڵحی عەشایەری چارەسەر نەکرێت، "نابێت ژن کڕین و فرۆشتنی پێوەبکرێت".

 

ژینۆ ڕەشید، ئەندامی ڕێکخراوی ژنانی کوردستان بەداخە بۆ کوشتنی ژنێکی تر و دەڵێت: دوای گیانلەدەستدانی شنیاریش ئێمە لەگەڵ شنیارین و ڕێگر دەبین لەوەی کەیسەکە بەلاڕێدا ببرێت، قسەمان لەگەڵ دایکی شنیار کردووە و تائێستا دەڵێت بە هیچ بڕە پارەیەک ڕازی نابین و سوڵح ناکەین داواکارین کەیسی شنیار ون نەبێت و بکوژ بەسزای خۆیی بگات.

 

شنیار هونەر یەکەمین ژن نییە بکوژرێت و لە ڕابردوودا کەیسی سێوان قادر هاوشێوەی شنیار هونەر بووە، بەڵام بە داکۆکیکردن و سور بوون لەسەر کەیسی سێوان قادر دوای ١٧ دانیشتن دادگا سزای زیندانی هەتاهەتایی بەسەر بکوژەکەیدا سەپێنرا، داوا و چاوەڕێش دەکرێت کەیسی شنیار هونەریش بەهەمان شێوە بگاتە سزادانی تاوانبار.

 

ت.پ