نەغم چاچان

 

قامیشلۆ- یەکێتی ڕاگەیاندنی ژنان "یەرەژە" لە باکوور و ڕۆژهەڵاتی سووریا ئامادەکاری دەکات بۆ ئەنجامدانی چوارەمین کۆنفرانسی خۆی کە بڕیارە لە ٨ی تشرینی دووەم بەڕێوە بچێت، بۆ بەهێزکردنی ڕۆڵی ژنان لە میدیا و پەرەپێدانی وتاری دیموکراتیک.

 

یەکێتی راگەیاندنی ژنان "یەرەژە"، لە ڕێگەی چوارەمین کۆنفرانسی خۆیەوە هەوڵدەدات پێکهاتەیەکی ڕێکخراوەیی کاریگەر دابنێت کە تیشک بخاتە سەر گرنگی قۆناغی ئێستا، کە تێیدا ژنان ڕووبەڕووی ئاستەنگی میدیایی دەبنەوە لە ناوچەکەدا، هەروەها ئامادەکارییەکان بریتین لە ڕێکخستنی دانیشتنێک بۆ گفتوگۆکردن لەسەر هەڵسەنگاندنی دیمەنی میدیا لە ڕوانگەیەکی ژنانەوە و پێشوازیکردن لە ڕۆژنامەنووس و چالاکوانانی ژن لە سەرانسەری باکوور و ڕۆژهەڵاتی سووریا، کە ڕەنگدانەوەی هەمەجۆریی ئەزموونەکانە، هەروەها پەروەردەکردنی گفتوگۆ لەسەر پەرەپێدانی وتاری میدیایی ژنان.

 

''یەکێتی میدیای ئازادی ژنان "یەرەژە": گەشتێکی خەبات و دامەزراندن''

 ئارین سوید، وتەبێژی یەکێتی راگەیاندنی ژنان "یەرەژە"، جەختی لە گرنگی ئەم هەنگاوە لە بەهێزکردنی بوونی ژنان لە گۆڕەپانی ڕاگەیاندن و پەرەپێدانی وتاری دیموکراتیک لە ڕوانگەی ژنانەوە کردەوە.

 

هەروەها ئاماژەی بە نەبوونی چوارچێوەیەکی ڕێکخراوەیی کرد کە ژنە ڕۆژنامەنووسانی سەردەمی دەسەڵاتی ڕژێمی پێشووی سووریا کۆبکاتەوە، وتی: سەرهەڵدانی قەیرانی سووریا خاڵی وەرچەرخانی بەخۆیەوە بینی، چونکە ژنانی ڕۆژنامەنووس خۆیان لە دڵی ڕووداوەکاندا بینیەوە، ڕاستەوخۆ ڕووبەڕووی ئاستەنگەکان بوونەتەوە و تووشی فشاری بەرچاو بوون، هەروەها ژنانی ڕۆژنامەنووس لەو ماوەیەدا ڕووبەڕووی پرسی بێئەندازە بوونەتەوە لە پراکتیزەکردنی ڕۆژنامەگەریدا، بە لەبەرچاوگرتنی نەبوونی پشتیوانی و ڕێکخستن کە مسۆگەری بەردەوامی و بەشداری چالاکانەیان بکات، خوێندنی ڕۆژنامەگەری لەو سەردەمەدا تەنها بۆ ئەو کەسانە سنووردار بووە کە پەیوەندییان بە ڕژێمی پێشووی سووریاوە هەبووە یان پشتیوانیان لێدەکرێت، بەو پێیەی ئەوانی دیکە ڕێگەیان پێنەدراوە ناوی خۆیان لە کۆلێژەکانی ڕاگەیاندن تۆمار بکەن یان هەلی خوێندن لەو بوارەدا بەدەستبهێنن.

 

جەختیکردەوە، کە ژینگەی سیاسی و کۆمەڵایەتی ئەو سەردەمە ژیانی ژنانی زۆر بەرتەسک دەکردەوە و نەیانهێشت ئاواتەکانیان بەدەست بهێنن بۆ ئەوەی ببنە ڕۆژنامەنوسێکی سەربەخۆ، هەروەها ژمارەی ئەو کەسانەی لەو ماوەیەدا خوێندنی ڕۆژنامەگەرییان هەڵبژاردووە زۆر سنووردار بووە، ئەویش لە ئەنجامی سنووردارکردن و هەڵاواردنە سیستماتیکییەکان.

 

ئاماژەی بەوەشکرد، ژنانی ڕۆژنامەنووس لە ناوچەی باکوور و ڕۆژهەڵاتی سووریا هەوڵی بەرچاویان داوە بۆ دامەزراندنی دیمەنێکی میدیایی ژنان کە ڕەنگدانەوەی ڕاستی و خواستەکانی ژنان بێت، دەستپێکردنی شۆڕشی ١٩ی تەمووز لەو ناوچانەدا بناغەیەکی بەهێزی میدیایی دابینکرد، کە لەسەر بنەمای میراسێکی دوورودرێژی خەبات بوو، ژنانی ڕۆژنامەنووس ئیلهامیان لە ئەزموونی کەسایەتییە پێشەنگەکانی وەک غوربەتلی ئەرسۆز و نوژیان ئێرهان وەرگرت، کە ئەمەش بووە هۆکاری ئەوەی هەڤاڵانی ئەمڕۆ درێژە بە ڕێگای بەرخۆدان بدەن.

 

وتیشی: ئەم ئەزموونانە وایکردووە ژنانی ڕۆژنامەنووس پێکهاتەیەکی ڕێکخراوەی دابمەزرێنن کە مافەکانی ژنان بپارێزێت و گۆڕانکاری لە زمانی بڵاوکردنەوەدا بهێنێتە ئاراوە و سیاسەتی میدیایی تایبەت بەرهەمبهێنێت کە لە ڕوانگەیەکی ڕزگارکەرەوە پرسەکانی ژنان دەرببڕێت.

 

''ئەزموونی پێشەنگایەتی ئیلهام بەخشە بۆ ژنانی ڕۆژنامەنووس لە باکوور و ڕۆژهەڵاتی سووریا''

 ئارین سوید، وتی: لە میانەی سێیەمین کۆنفرانسی یەکێتی میدیای ژنان "یەرەژە"، کە لە ساڵی ٢٠٢٠ بەڕێوەچوو، سەندیکاکە بە ڕەسمی بەم ناوەوە دامەزرا، لەکاتێکدا پێشتر ڕێکخراوی میدیایی بۆ ژنانی ڕۆژنامەنووس هەبووە، بەڵام کۆنفرانسەکە وەرچەرخانێکی گرنگی لە گەشتی سەندیکاکەدا پێکهێنا.

 

جەختی لەوە کردەوە، کە ئامادەکارییەکان بۆ کۆنفرانسی چوارەم لەسەر بنەمای میراسی ئەم خەباتەیە، وەکۆنفرانسەکە نوێنەرایەتی ساتێکی سەرەکی دەکات لە پەرەپێدانی کاری میدیایی ژنان، هەروەها لوتکەی هەوڵ و بەرخۆدانێکی بەرچاوە کە لەلایەن زۆرێک لە ژنانی ڕۆژنامەنووسەوە ئەنجامدراوە بۆ گەیشتن بەو ئاستەی کە سەندیکاکە ئەمڕۆ سوودی لێ وەردەگرێت.

 

ئارین سوید، ڕوونیشیکردەوە، کۆنفرانسی یەکێتی ڕاگەیاندنی ژنان "یەرەژە"، شایەتحاڵی پێکهێنانی لیژنەکانی ڕێکخستن بووە، هەروەها ژمارەی ژنانی ڕۆژنامەنوس لە ناوچەی باکوور و ڕۆژهەڵاتی سووریا  ٥٠٠ کەسی تێپەڕاندووە، کە ئەم ئامادەبوونە بەرفراوانە پەرەسەندنێکی ئەخلاقی گەورەمان پێدەبەخشێت و بەڵێنمان بۆ هەڤاڵانی شەهیدمان نوێ دەکاتەوە کە درێژەدان بەو ڕێبازە بدەین، وە لەکاتی کۆنفرانسەکەدا سێ لیژنەی ئامادەکاری بۆ ڕێکخستنی چالاکییەکە و کارکردن لەسەر پەرەپێدانی پەیڕەوی ناوخۆی سەندیکاکە بۆ جێبەجێکردنی خواستەکانمان و بەهێزکردنی ڕۆڵی ژنان لە میدیاکاندا دامەزران.

 

''گۆڕانکارییەکانی میدیای ژنان''

 ئارین سوید، ئاماژەی بە پێویستی هەمووارکردنەوەی پەیڕەوی ناوخۆی یەکێتیی میدیای ژنان"یەرەژە"  کرد، هەروەها ئەو پێشهاتانەی لە ساڵی ٢٠٢٥ەوە لە گۆڕەپانی سووریادا بەدی کراون، پێویستی بە پێداچوونەوە و هەڵسەنگاندنی هەندێ ماددە هەیە.

 

وتیشی: ئامانجی سەرەکی کۆنفرانسەکە بریتی بوو لە پێداچوونەوە بە بڵاوکراوەکانی یەکێتیەکە لە ماوەی ساڵانی ڕابردوودا و هەڵسەنگاندنی ئەندامانی سەرکردارییەتی وەک دەستەی بەڕێوبەری و ئەنجومەنی یەکێتی و نوێنەرانی، کە لە ڕووی سروشتی کارەکانیانەوە تا چەند ئامانجە دیاریکراوەکانی پێشتریان بەدیهێناوە، ئەوەی ماوەتەوە بە جێبەجێنەکراوی ماوەتەوە، کە ئەمەش هەمووی بە ئامانجی پەرەپێدانی میکانیزمەکانی کارکردن و بەرزکردنەوەی ڕۆڵی ژنان لە میدیادا بە شێوەیەکی کاریگەرتر بوو.

 

ئارین سوید ڕایگەیاند، چوارەمین کۆنفرانسی یەکێتی ڕاگەیاندنی ژنان "یەرەژە" ڕۆژی ٨ی تشرینی دووەم لە قامیشلۆ بەڕێوەدەچێت، هەروەها کۆنفرانسەکە هەنگاوێکی چارەنووسسازە بۆ گەیشتن بەو ئامانجانەی کە سەندیکاکە دایناوە، هەر ئەمەشە ئامانجی سەندیکاکەیە کە دوو ساڵ جارێک کۆنفرانسێک ئامادە دەکات، بەڵام هەلومەرج و ئاستەنگی بەردەم ناوچەکانی باکوور و ڕۆژهەڵاتی سووریا بووەتە هۆی دواخستنی، هەروەها ١٧٠ ژنی ڕۆژنامەنووس بەشداری کۆنفرانسەکە دەکەن، کە ڕەنگدانەوەی بنکەی گەشەسەندنی کاری میدیایی ژنانە و پاڵنەرێکی بەهێز بۆ بەردەوامی خەبات و گەشەسەندن دەڕەخسێنێت.

 

شایانی باسە کە یەکێتی ڕاگەیاندنی ژنان "یەرەژە" لە ساڵی ٢٠١٣ یەکەمین کۆنفرانسی خۆی ئەنجامدا، دواتر لە ساڵی ٢٠١٦ دووەم کۆنفرانس و لە ساڵی ٢٠٢٠ سێیەم کۆنفرانسی ئەنجامدا.