ناوەندی هەواڵ

 

لە مەراسیمێکی بەشکۆدا، بە بەشداری ژمارەیەکی بەرچاو لە خەڵک، کەسوکاری شەهید و نوێنەرانی تەوژمە جیاوازەکان، تەرمی شەهید «دیلان شرناخ»، کە بە ناوی ڕاستەقینەی ڕابیعە بارنچ ناسراوە، لە گۆڕستانی شەهیدان  " محەمەد قەرەسونگول " لە بناری قەندیل بە خاک سپێردرا.

 

لە سەرەتای مەراسیمەکەدا، سۆزدار دڵسۆز بە ناوی پاژک قسەی کرد و لە وتەکانی خۆیدا ئاماژەی بە ژیان و تێکۆشانی شەهید دیلان کرد.

 

سۆزدار دڵسۆز وتی، شەهید دیلان لە تەمەنی منداڵییەوە لەگەڵ بیر و هەستی ئازادی ئاشنا بووە و لە گەنجیدا بڕیاری بەشداری لە تێکۆشانی ئازادی و ڕیزەکانی گەریلا داوە و بە بێ دوودڵی بەردەوامی بە تێکۆشانەکەی داوە.

 

بەپێی وتەکانی سۆزدار دڵسۆز، شەهید دیلان لە ماوەی تێکۆشانی خۆیدا وەک فەرماندەیەکی هێزی ژنان و هەروەها وەک بەرپرسی تەڤگەری ژنان لە بەشە جیاوازەکانی کوردستاندا چاڵاکی کردووە و بەشێکی گرنگی ژیانی خۆی بۆ ڕێکخستن و پەروەردەکردنی ژنان و گەل تەرخان کردووە.

 

ئەو هەروەها ئاماژەی بەوە کرد کە شەهید دیلان لە ساڵی ١٩٩٤ەوە کە بە تێکۆشانەکەوە پەیوەست بووە، تا کاتی شەهیدبوونی بە بێ وەستان بەردەوام بووە و لە کۆتایی شەڕ و بەرخۆدانی ڕۆژئاوا، لە بەرخۆدانی تەبقا و ڕەقەشدا بەشداری کردووە.

 

بەپێی قسەکانی سۆزدار دڵسۆز، شەهید دیلان سەرەڕای تووشبوونی بە نەخۆشییەکی سەخت، ماوەیەکی درێژ بە تێکۆشانەکەی بەردەوام بووە و تا دوا ساتەکانی ژیانی لەسەر ئەو ڕێبازە مایەوە.

 

سۆزدار دڵسۆز لە کۆتایی وتەکانی خۆیدا وتی، شەهید دیلان بۆ هاوڕێ و هاوسەنگەرەکانی تەنها ناوی شەهیدێک نییە، بەڵکو وەک یادەوەرییەکی تێکۆشان و ڕەنجی ٣٢ ساڵەی دەبینرێت و هاوڕێکانی خۆیان بە بەردەوامبوون لە خاوەندارێتی ئەو ڕەنج و میراثە پابەند دەزانن.

 

لە بەشی دیکەی مەراسیمەکەدا، سەلیم عەبدولڕەحمان، برای شەهید دیلان، بە ناوی خانەوادەکەی قسەی کرد و وتی کە ڕێگای شەهیدان بەجێ ناهێڵن و بەردەوامی بە ڕێبازی ئەوان دەدەن.

ئەو هەروەها هیوا خواست کە خاکی کوردستان ڕزگار ببێت...

 

مەراسیمەکە دوای وتار و قسەکان، بە خوێندنەوەی درووشمی شەهید نامرێت، بژی ڕێبەر ئاپۆ کۆتایی پێهات.

 

 

ناسنامەی شەهید:

ناسناو: دیلان شرناخ

ناوی ڕاستەقینە: ڕابیعە بارنچ

ساڵ و شوێنی لەدایکبوون: ١٩٧٧، شرناخ

دایک و باوک: زەلیحە ـ عەبدولڕەحمان

ساڵ و شوێنی بەشداریکردن: ١٩٩٤، زاخۆ

ڕێکەوتی شەهیدبوون: ١٧ی ئەیلوولی ٢٠٢٦