ناوەندی هەواڵ

 

ماجید بیکی بەخشدەری شاری ئەحمەدئاباد، لە ڕاپۆرتێکدا ڕایگەیاندووە کە دوێنێ خوێندکارێک بەهۆی خنکاندن لە قوتابخانەکەدا گیانی لەدەستداوە و لێکۆڵینەوە دەستیپێکردووە.

 

بە وتەی ماجید بیکی، ڕۆژی چوارشەممە ٥ نیسان، ئەم خوێندکارە تەمەن ٩ ساڵە دوای کۆتایی هاتنی وانەکانی بەیانیان لە قوتابخانەیەکی ٣ پۆلی ماوەتەوە، بەڕێوەبەری قوتابخانەکەش دەرگای قوتابخانەکەی قوفڵ کردووە و ڕۆشتووە.

 

خێزانی ئەم کچە ٩ ساڵانە دوای دواکەوتنی گەڕانەوەی منداڵەکەیان بۆ ماڵەوە چوونەتە قوتابخانە، بەگوێرەی زانیاری ڕاپۆرتەکە، دوای ڕووبەڕووبوونەوەی دەرگای داخراو، خوێندکارەکە سەری لە نێوان بارەکانی پەنجەرەی پۆلەکەدا گیر بووە و لە ئەنجامدا خنکاوە.

 

باس لەوەش کراوە، دوای کردنەوەی پەڕاوی لێکۆڵینەوە لە ڕووداوەکە، بەڕێوەبەری قوتابخانەکە وەک بەرپرسی سەرەکی قوتابخانەکە و بەڕێوەبەری پەروەردەی بەڕێوەبەرایەتییەکە بانگکراون بۆ ئەوەی ڕوونکردنەوە بدەن.