ناوەندی هەواڵ

دادگای تێهەڵچوونەوەی مالیزیا بڕیارێکی گرنگی هەڵوەشاندەوە کە دەڵێت ژنان دەبێ بتوانن بە هەمان شێوەی پیاوانی مالیزیا ڕەگەزنامەکەیان بگوازنەوە بۆ ئەو منداڵانەی لە دەرەوەی وڵات لەدایک دەبن.

 

دادوەرەکان لە بڕیارێکیدا لایەنگری حکومەت بوون و بڕیاری دادگای باڵای مانگی ئەیلولی ٢٠٢١یان ڕەتکردەوە کە ژنانی مالیزیا هەمان مافی پیاوانیان هەیە کە ڕەگەزنامە بە منداڵەکانیان بدەن.

 

دۆسیەکە پشت بە مادەی ١٤ی دەستووری مالیزیا دەبەستێت، کە بەڕوونی مافدەدات بە باوکان بۆ پێدانی ڕەگەزنامە بە منداڵەکانیان کە لە دەرەوەی وڵات لەدایکبوون، بەڵام هەر باسێک لە دایکان نەکراوە.

 

گروپی داکۆکیکار "Family Frontiers" لەگەڵ شەش دایکی زیان لێکەوتوو، لە مانگی کانوونی دووەمی ٢٠٢٠دا تەحەدای دەستووریبوونی ئەو بڕگەیەیان کرد و ئاماژەیان بەوە کرد کە دادوەرەکان دەبێ ئەو بڕگەیە بەگوێرەی بنەمای یەکسانی جێندەری لێکبدەنەوە.

 

پارێزەرانی گروپەکە ڕایانگەیاند کە دۆسیەکەیان دەبەنە دادگای فیدراڵی کە باڵاترین دادگای مالیزیایە، وەزیری ناوخۆ پێشتر رایگەیاندبوو کە حکومەت تانە لە بڕیاری دادگای باڵای کڕینی کات بۆ هەموارکردنەوەی دەستوور لە بەرژەوەندی دایکان داوە، سەرەتا بە پێکهێنانی لیژنەیەکی نوێی پەرلەمانی بۆ لێکۆڵینەوە لەو پرسە کە لە مانگی کانوونی یەکەمی ساڵی رابردوو دەستیپێکرد.

 

ئەو شەش ژنەی کەیسەکەیان تۆمارکردووە، دوای بڕیارەکەی دادگای خوارەوە توانیان ڕەگەزنامە بۆ منداڵەکانیان کە لەدایکبووی دەرەوەی وڵات مسۆگەر بکەن، بەڵام دادگای تێهەڵچوونەوە ڕایگەیاندووە، پێویستە داواکارییەکانی دیکە بە بەستوویی بمێننەوە تا دادگای فیدراڵی بڕیارەکەی دەدات.

 

وەزیری ناوخۆ مانگی ڕابردوو لە پەرلەمان ئاشکرای کرد کە لە نێوان ساڵانی ٢٠٢١ تا تەمموزی ئەمساڵدا ٥٩١ پێشکەشکردن بەپێی مادەی ١٤ لە منداڵانی لەدایکبووی دەرەوەی وڵات بۆ دایکانی مالیزیا هەبووە، هەندێکیان چارەسەر کران بەڵام زۆربەیان تا ئێستاش بە شێوەیەکی هەڵپەسێردراو ماونەتەوە.