سەردەشت

 

دوێنێ، بەیان ئیسماعیل زادە، تەمەن ٢٤ ساڵ، خەڵکی گوندی کولی سەر بە شاری ڕەبەتی ڕۆژهەڵاتی کوردستانە، دوای دوو هاوسەرگیریی شکستخواردوو کۆتایی بە ژیانی خۆی هێنا و خێزانەکەی دەڵێن بەهۆی فشاری دەروونییەوە خۆیکوشتووە.

 

نەبوونی یاساکانی پاراستن و سیاسەت و کولتوری هەڵەی کۆمەڵگە بەرامبەر بە ژنان لەو شتانەن کە وایکردووە زیاتر ڕووبەڕووی کوشتن و خۆکوشتن ببنەوە، بەڵام حکومەت لە پرۆسەی جیابوونەوە و دادگادا هیچ مافێک بە ژنان نادەن بۆ سەرپەرشتیکردنی منداڵ و بەدەستهێنانی مارەییەکانیان، هەر لەبەر ئەم هۆکارەش ​​تووشی فشاری هەردوولا دەبن، و دوای هاوسەرگیریش بەهۆی نەبوونی پاڵپشتی داراییەوە، ناچار دەبێت لەگەڵ خێزانەکەیدا بژی، و دەبێت فشارێکی دەروونی زۆر هەڵبگرێت بەهۆی داب و نەریتی کۆمەڵگەوە.

 

سەحەر.م ناوی ساختە بۆ چالاکوانێکی فێمینیست و ئەندامی کەمپەینی کوشتنی ژنان لە ژێر ناوی شەرەف وتی: حکومەت لە پرۆسەی هاوسەرگیریدا ژنان لە ڕووی داراییەوە  وابەستەی پیاوان دەکات و مافی دادپەروەرانەیان پێنابەخشێت لە پرۆسەی جیابوونەوەدا، هەر ئەمەشە وایکردووە ژنان ئازار بچێژن، بەپێی لێکۆڵینەوە مەیدانییەکان، زۆربەی ئەو ژنانەی کە تووشی کوشتن یان خۆکوشتن دەبن لە چەند ساڵی ڕابردوودا، لە پرۆسەی جیابوونەوەدا بوون و بەهۆی فشارەکانەوە کۆتاییان بە ژیانیان هێناوە، بەڵام ئەگەر ژنێکی جیابووەوە سەربەخۆ بوو، کۆمەڵگە بە شێوەیەکی نەرێنی سەیری دەکات و زۆربەی کات بە گۆشەگیری دەمێنێتەوە.

 

ئاماژەی بەوەشکرد، پشتیوانی دامەزراوەیی بۆ ماڵە سەلامەتەکان بۆ شارەکانی وەک سەردەشت، بانە، و مەهاباد پێویستە، بەڵام هیچ بڕە پارەیەکیان بۆ تەرخان ناکراوە، هەر لەبەر ئەم هۆکارەش ​​ژمارەی خۆکوشتنی ژنان لە کۆمەڵگەدا لەوپەڕی هەڵکشاندایە، توندوتیژیە خێزانیەکانیش بە شێوەی جۆراوجۆرە نەک تەنها خەمۆکی و فشاری دەروونی چەندین شێوازی جیاوازی هەیە.