سلێمانی

ئێوارەی دوێنێ لە شاری سلێمانی لە ئۆفیسی نوێنەرایەتیی پارتی یەکێتی دیموکرات " پەیەدە " کۆڕێک بۆ یادکردنەوەی سێ ژنی خەباتکاری کوردی ڕۆژئاوای کوردستان سازکرا بە ناوی " دایکی ئامینە وەیسی، زەهرا بەرکەس و هەبوون مەلا خەلیل " کە لە ٢٣ی حوزەیرانی ساڵی ٢٠٢٠ لە بۆردوومانێکی فڕۆکەی بێ فڕۆکەوانی دەوڵەتی داگیرکەری تورکیە شەهیدبوون.

 

 ژمارەیەک لە ژنانی باشوور و ڕۆژئاوای کوردستان بەشداری کۆڕەکەبوون، و یادکردنەوەکە کە بە دەقەیەک وەستان بۆ گیانی پاکی شەهیدان دەستی پێکرد، و پاشان لێمان شەویش نوێنەری کۆنگرەی ستار لە باشووری کوردستان وتارێکی پێشکەشکرد و وتی: لە دووەمین ساڵیادی ئەو ژنە شۆڕشگێڕانەدا ئێمە یادیان بەرز ڕادەگرین، ئەوان لە شەڕێکی زۆر سەختی داعش دەرباز ببوون، خەبات و تێکۆشانیان دەکرد بۆ ئازادیی کۆمەڵگە و ژنان، ڕووبەرووی ئەو مەترسی و هێرشانە دەبوونەوە کە لەسەر ژنان هەبوون بەڵام بەهۆی هێرشی دەوڵەتی تورکیاوە شەهید بوون و کرانە ئامانج چونکە دەیانەوێت ڕێگری لە خەبات و تێکۆشانی ژنان بکەن تا ژنان نەتوانن پشت بەخۆیان ببەستن، بەڵام ئەرکی ئێمەیە بەردەوامی بە ڕێبازەکەیان بدەین.

 

دواتر بانو هەڵەبجەیی، ئەندامی ڕێکخراوی ژنانی ئازادی کوردستان وتارێکی پێشکەشکرد و وتی: ژنان لەسەر فکرەی ڕێبەر ئاپۆ هۆشیاربوونەتەوە و پێشەنگایەتی شۆڕشێک دەکەن و گەورەترین ڕێکخراوی تیرۆرستی وەک داعش بە چۆکدا دەهێنن، شۆڕشەکانی پێشین نەیانتوانییوە وەک پێویست شوێنی خۆیان بگرن و ڕووبەڕووی پلانی وڵاتانی زلهێز ببنەوە، بەڵام ئێستا گەلی کورد لەسەر فکرەی ئازاد و ژنی ئازاد سەربەرزە و خەباتی خۆی بەردەوامی پێداوە و پێشەنگایەتی ژنانی هەموو جیهان دەکەن.

 

لە دواتردا لەلایەن دایکانی شەهیدانی ڕۆژئاوای کوردستانەوە مۆم لەسەر وێنەی هەرسێ ژنە شەهید داگیرسێندرا و فیلمێکی دۆکیومێنتاریش نیشاندرا لەسەر خەبات و تێکۆشانی ئەو سێ ژنە شۆڕشگێڕە.