لە هێرشەکەی دێرەزوور منداڵێک گیانی لەدەستدا
ناوەندی ڕاگەیاندنی هێزەکانی ئاسایشی ناوخۆ ڕایگەیاند، لە هێرشەکەی دوێنێی شارۆچکەی زیبان لە ڕۆژهەڵاتی دێرەزوور، بەهۆی گولـلەی پاشماوەکانی ڕژێمی پێشوو و "بەرگری نیشتمانی"، منداڵێک گیانی لەدەستداوە.
ناوەندی هەواڵ
ناوەندی ڕاگەیاندنی هێزەکانی ئاسایشی ناوخۆ سەبارەت بە هێرشەکانی پاشماوەکانی ڕژێمی پێشووی "بەرگری نیشتیمانی" بۆ سەر شارۆچکەی زیبان لە ڕۆژهەڵاتی دێرەزوور ڕاگەیەندراوێکی بڵاوکردەوە.
لە ڕاگەیەندراوەکەدا هاتووە: دوێنێ ٢٠ی کانوونی دووەم، کاتێک ئەندامانی پاشماوەکانی ڕژێمی پێشوو و "بەرگری نیشتیمانی" هەوڵیاندا ئاژاوە لە شارۆچکەی زیبان لە ڕۆژهەڵاتی دێرەزوور دروست بکەن، منداڵێک بەناوی ئەحمەد محەمەد ئەلعیزەدین بە گولـلە گیانی لەدەستدا.
ئێمە، هێزەکانی ئاسایشی ناوخۆی هەرێمی باکوور و ڕۆژهەڵاتی سورویا، سەرەخۆشی و ئارامی بۆ بنەماڵەی ئەو منداڵە دەخوازین. داوا لە دانیشتووان دەکەین هیچ تەقەیەک نەکەن.
ڕاگەیەندراوی قەسەدە
هەروەها ناوەندی ڕاگەیاندنی قەسەدە سەبارەت بە ڕووداوەکانی گوندەکانی ڕۆژهەڵاتی دێرەزوور راگەیەندراوێکی بڵاوکردەوە و ڕایگەیاند: شانەکانی پاشماوەکانی ڕژێمی بەعس و میلیشیاکانی "بەرگری نیشتیمانی" لە شارۆچکەکانی زیبان و تەیان لە چالاکییەکانی تاڵانکاریی خۆیان بەردەوام بوون، میلیشیاکان ڕێگای سەرەکییان داخست و هێرشیان کردە سەر بنکە ئەمنییەکان و دامەزراوە خزمەتگوزارییەکان.
هەروەها لە ڕاگەیەندراوەکەدا ئاماژە بەوە کراوە، هێزەکانی قەسەدە و هێزەکانی هاوپەیمانی نێودەوڵەتی بەردەوام دەبن لە هەوڵە هاوبەشەکانیان و ڕێگەی گونجاو بۆ دابینکردن و وەرگرتنی هاوکاری بەکاردەهێنن، ئەمەش ڕێگری لە هەنگاونانی شانەکانی داعش دەکات.