ناوەندی هەواڵ

 

کۆمەڵەی ژنانی ئازادی ڕۆژهەڵاتی کوردستان "کژار" دووپاتیکردەوە، کە تێکۆشانی ژنانی زیندانی پشت مێزی دادگا دەنگی ژیانە لە بەرامبەر ستەم و زیندوو ڕاگرتنی هیوا.

 

کژار ئەمڕۆ ٢٧ی ئەیلوول، لە کاردانەوە بە هەواڵی گیان لەدەستدانی سومەیە ڕەشیدی، زیندانی سیاسی ڕاگیراو لە زیندانی قەرچەکی شاری ورامین، ڕاگەیەندراوێکی بڵاوکردەوە، کە سومەیە ڕەشیدی دوای ڕەتکردنەوەی چارەسەری پزیشکی کەوتە چاودێری چڕ و دوای ١١ ڕۆژ لە تێکچوونی باری تەندروستی گیانی لەدەستدا، لە ڕاگەیاندراوەکەدا، دووپاتی کردەوە، کە لەدەستدانی گیانی ژنانی زیندانی لە ناو زیندانەکاندا تاوانێکی ڕوون و ئامانجدار و بەردەوامە کە لەلایەن کۆماری ئیسلامییەوە ئەنجام دەدرێت.

 

خەباتی ژنانی زیندان

لە ڕاگەیەندراوەکەدا، ئاماژە بەوە کراوە، کە چەند ڕۆژێک لەمەوبەر هەواڵی کۆچی دوایی سومەیە ڕەشیدی لە زیندانی قەرچەک نیگەرانییەکی زۆری لای هاوزیندانەکانی، چالاکوانی مافی ژنان و بە گشتی کۆمەڵگە دروستکرد، سومەیە ڕەشیدی دوای شۆڕشی کۆمەڵایەتی لە ئێران چەندین جار دەستبەسەر کرابوو و سەرەڕای نەخۆشی سەختی لە بەشی ژنانی زیندانەکانی ئێڤین و قەرچەک لە چاودێری پزیشکی بێبەش کرابوو، "ئێمە سیاسەتی سەرکوتگەرانەی ڕژێمی ئێران شەرمەزار دەکەین."

 

لە ڕاگەیەندراوەکەدا، جەخت لەوە کراوەتەوە، کە ساڵانێکی زۆرە دەسەڵاتدارانی ئێران بۆ سەرکوتکردنی دەنگی زیندانییەکان پەنایان بۆ هەموو ڕێگەیەک بردووە و بەدرێژایی ساڵان زۆرێک لە ژنانی زیندانی تووشی ئەشکەنجە بوون، هەروەها کۆماری ئیسلامی بە شێوەی جۆراوجۆر، بە لێدوانی دژبەیەک و گێڕانەوەی شێواو بە ئامانجی شاردنەوەی ڕاستی، ڕاستیەک کە ناتوانێت لێی تێبگات یان تەمومژاوی بکات: ڕاستییەک کە پێی دەوترێت خەبات و خۆڕاگری ژنان لە زیندان.

 

هەموو ڕۆحێکی کۆچکردوو بە دروشم پێشوازی لێدەکرێت

لە ڕاگەیەندراوەکەدا، ئاماژە بەوە کراوە، کە ژنانی زیندانی شۆڕش ساڵانێکە سەلماندوویانە کە ئەوان لە پشت مێزی دادگادان نەک بۆ مردن، بەڵکو بۆ واتای ژیان، ژیانی هەریەکەیان بە زنجیر بەستراوەتەوە و هەموو ڕۆحێکی ڕۆیشتوو بە دروشم و گۆرانی و سروود پێشوازی لێدەکرێت، ئەمەش فەرهەنگێکە کە کۆماری ئیسلامی ناتوانێ سەرکوتی بکات یان ڕووبەڕووی ببێتەوە و هەر بۆیە ڕاستییەکان دەشارێتەوە.

 

لە ڕاگەیەندراوەکەدا، ڕوونیکردووەتەوە، کە زۆرێک لە زیندانیان، لە زیندانی قەرچەکەوە تا زیندانی یەزد و زیندانەکانی دیکەی ئێران، چاودێری پزیشکییان لێ بێبەش دەکرێت، وەک زەینەب جەلالیان، زیندانی سیاسی کورد، کە سەرەڕای تووشبوونی بە چەندین نەخۆشی، لەوانەش کۆکە و نەخۆشییەکانی دەم و ددان، تەنگەنەفەسی، و کێشەکانی گورچیلە و هەرس کە لە کاتی زیندانیکردنیدا تووشی بووە، مافی جێهێشتنی لێسەندراوەتەوە.

 

ڕێکخراوی کژار جەختی لەوە کردەوە، کە زۆر گرنگە ئێمە وەک مردنێکی ئاسای سەیری مەرگی سومەیە ڕەشیدی و کەسانی دیکەی وەک ئەو نەکەین، ئەوەی ڕوودەدات کوشتن و تاوانێکی ڕوون و ئامانجدار و بەردەوامە لە لایەن کۆماری ئیسلامییەوە، کە تیشک دەخاتە سەر لاوازی و بێدەسەڵاتی خۆی لەم ڕۆژانەدا، کە بۆنی بێ هیوای و بێزاری لە سیاسەتی ناوخۆیی و دەرەوەی ڕژێمدایە، لەگەڵ خۆڕاگری و خەباتی ژنانی زیندانی لە زیندانەکاندا ئەوەیە کە هیوا لە دەمارەکانی ژیاندا دەڕژێت.