لەناوبردنی دارستانەکانی زاگرۆس لەلایەن هێزەکانی ڕژێمی ئێران
دارستانەکانی زاگرۆس ڕووبەڕووی ئاگرکەوتنەوەی بەردەوام دەبنەوە، چالاکوانانی ژینگەپارێزی پێیان وایە ئەم ڕووداوانە بەهۆی لەناوبردنی بە ئەنقەست لەلایەن هێزەکانی ڕژێمی ئێرانەوە ڕوودەدەن.
![](https://jinhaagency.com/uploads/so/articles/2023/08/20230827-20230827-photo-2023-08-27-18-46-03-jpg545cdf-image-jpg19677c-image.jpg)
سەردەشت
هەرچەندە وەرزی هاوین بەرەو کۆتا دەچێت، بەڵام ئاگرکەوتنەوەیەکی زۆر لە دارستانەکانی زاگرۆس بە تایبەتی لە شاری سەردەشت بەردەوامە و لە ماوەی هەفتەی ڕابردوودا لانیکەم ٩ ئاگر لە شاری سەردەشت کەوتوونەتەوە.
بە وتەی چالاکوانانی ژینگەپارێز، ئەم ڕووداوانە بە هۆی وێرانکردنی بە ئەنقەست لەلایەن هێزە ئەمنیەتی و نیزامییەکانی ڕژێمی ئێرانەوە بووە و ئەم هێرشانە بۆ سەر دارستانەکان بە شێوەیەکی ڕێکوپێک و زیاتر لە ڕابردوو ڕوودەدەن.
سارارا "ناوی خوازراو" یەکێک لە چالاکوانانی ژینگەپارێزی ئەم بوارە دەڵێت: "ئەوان ڕێگەی جیاواز بەکاردەهێنن بۆ زیانگەیاندن بە دارستانەکان، هەندێک جار هێزەکانی حکومەت یان کەسانێک کە بۆ ئەو مەبەستە بەکرێگیراون، ئاگر لە شوێنە جیاوازەکانی دارستانەکە دروست دەکەن و دواتر دەستبەجێ ناوچەکە بەجێدەهێڵن، لە هەندێک حاڵەتدا ئەم کەسانە بە بیانووی کۆکردنەوەی میوەی کێوی دەچنە ناو دارستانەکەوە و ئاگر دەکەنەوە."
ئاماژەی بەوەشکرد: "بەداخەوە چالاکوانانی ژینگەپارێز لە بەرامبەر ئەم جۆرە ڕووداوانەدا دەستی بەتاڵن و تەنها گژوگیا و گەڵای دار بەکاردەهێنن بۆ بەرەنگاربوونەوەی ئاگرەکان، ئەو ئیمکاناتانەی کە هەیانە، ستاندارد نین و تەنانەت هەندێکجار مەترسیدارن، وەک ئەو بەنزینە هەڵکەرانەی کە بۆ کوژاندنەوەی ئاگرەکە بەکاریدەهێنن."