ناوەندی هەواڵ

 

کۆمەڵەی ڕۆژنامەنووسانی ژنی میزۆپۆتامیا-مەکەگە لە ڕاگەیاندراوێکدا بەرامبەر بە هەڵکوتانە سەر کۆمپانیای گزنگی بەربەیان بۆ بەرهەمهێنانی بەرنامەی تەلەفزیۆنی سنوردار لە ٣١ی کانوونی یەکەمی ٢٠٢٤، لەلایەن دەزگای ئاسایشی سلێمانیەوە، بە بێ نیشاندانی هیچ بەڵگەنامەیەکی فەرمی و یاسایی، کاردانەوەی نیشاندا.

 

هەروەها لە درێژەی راگەیاندراوەکەدا هاتووە، ئەم کۆمپانیایە کە ماوەی ٧ ساڵە لە باشووری کوردستان کاردەکات و سەرجەم کارمەندەکانی ژنن، بووەتە دەنگی ژنانی هەرێم، ئەم کۆمپانیایە کە بەرنامەی بۆ یەکەمین کەناڵی تەلەفزیۆنی ژنان بەناوی ژن تیڤی بەرهەم دەهێنێت، لە هەولێرەوە تا سلێمانی، کەلار، دهۆک و زۆرێک لە شارەکانی ڕۆژهەڵاتی کوردستان بووە دەنگ و ڕەنگی ژنان".

 

"ئەوان دەیانەوێت لەبەردەم حەقیقەتدا ببنە بەربەست"

حکومەتی ناوەندی عێراق و حکومەتی هەرێمی کوردستان دەیانەوێت ڕێگری لە کۆمپانیای گزنگی بەربەیان بکەن لە ئاشکراکردنی ڕاستییەکان. ئێمە وەک کۆمەڵەی ڕۆژنامەنووسانی ژنی میزۆپۆتامیا-مەکەگە، پشتیوانی خۆمان لە کۆمپانیای گزنگی بەربەیان ڕادەگەینین و داوا لە دەسەڵاتداران دەکەین زووتر ئەم بڕیارە پێچەوانە بکەنەوە. ئێوە ناتوانن دەنگی ژنانی ڕۆژنامەنووس سەرکوت بکەن، لە گوربەتێلی تا گوڵستان و دەنیز و هێرۆ و جیهان، تکۆشانمان بۆ ڕاستی بەردەوام بوو، بەردەوامیش دەبێت".