ناوەندی هەواڵ

 

وتەبێژی وەزارەتی سەرچاوە ئاوییەکانی عێراق بە میدیاکانی ڕاگەیاندووە، زیاتر لە ساڵ و نیوێک لەمەوبەر وەزارەت هەڵمەتێکی گەورەی بۆ لابردنی خراپ بەکارهێنانەکان دەستپێکردووە، کە بریتی بوو لە گرتنەبەری ڕێوشوێن دژی زیاد بەکارهێنانەکان لە پڕۆژەکانی ئاودێری و پشکی ئاو، هەروەها تۆمارکردنی سکاڵا لەسەر سەرپێچیکاران لە دادگاکان ئەنجامدراوە و بەشێکی زۆریان یەکلایی کراونەتەوە.

 

بەپێی قسەی ئەو وتەبێژە ڕێوشوێنەکانی ئەنجامی خۆی هەبووە و بووەتە هۆی کەمبوونەوەی بەرچاو لە خراپ بەکارهێنانەکان لە وەرزی زستانی ڕابردوو و وەرزی هاوینی ئێستادا.

 

هەروەها وەزارەتەکە توانیویەتی ئاو بگەیەنێتە سەرجەم پارێزگاکان، بەتایبەتی پارێزگاکانی خوارووی عێراق، کە پشکی ئاویان نزیکەی تەواو بوونە.

 

جێی ئاماژەیە کە ڕێگریکردن لە سەرپێچی و زیاد بەکارهێنانی سەرچاوەکانی ئاو لە بەرژەوەندی کەرتی ئاو و پاراستنی ئەو سامانەدایە، بەڵام بەپێی قسەکانی وتەبێژی وەزارەتی سەرچاوەکانی ئاو، ستافی وەزارەتەکە تووشی هێرش دەبنەوە کە هەندێکجار دەگاتە لێدان و هێرشکردنە سەر بەڕێوەبەرایەتییەکان، لەلایەن هەندێک سەرپێچیکارانەوە کە ڕەتیدەکەنەوە سەرپێچییەکانیان لاببەن.

 

ئاماژەی بەوەشکردووە، "ئامانج لە هەڵمەتی لابردنی خراپ بەکارهێنانەکان بەدیهێنانی دادپەروەرییە لە گەیاندنی ئاو بۆ سەرجەم پارێزگاکان و سودمەندان، بەپێی ئەو پلانەی کە لەنێوان وەزارەتی سەرچاوەکانی ئاو و وەزارەتی کشتوکاڵدا دانراوە".