ناوەندی هەواڵ

 

شەوی ڕابردوو، ٢٨ی تشرینی یەکەم، دوای بڵاوبوونەوەی هەواڵی کۆچی دوایی ئارمیتا گراوند، خوێندکاری تەمەن ١٦ ساڵ کە لە تاران دەژی و لە بنەڕەتدا خەڵکی شاری کرماشانە، بە پێی ئەو گرتە ڤیدیۆییانەی لە تۆڕە کۆمەڵایەتییەکاندا بڵاوکراونەتەوە، کۆمەڵێک هاوڵاتی لە چەند ناوچەیەکی تاران لەوانە سەعدات ئاباد، چیتگار، ئێکبەتان و هتد، بە دروشمی "ئارمیتا گراوند، ڕێبازەکەت بەردەوامە"، ناڕەزایەتی خۆیان لە دژی کوشتنی ژنانی گەنج نیشان دا.

 

هەروەها خۆپیشاندەران لەناو ماڵ و باڵەخەکانی نیشتەجێبوونەوە دروشمی "مەرگ بۆ ڕژێمی کۆرپەکوژ"، "هەرکەس خوشکەکەمی کوشتبێت، دەیکوژم" و "دەستدرێژی تاوانی مەرگ بۆ سەر ئەم پارێزگایە"یان بەرزکردەوە.

 

دروشمەکانی وەک "مەرگ بۆ کۆماری ئیسلامی"، "مەرگ بۆ خامنەیی زوحاک"، "خامەنەیی زوحاک، تۆ لە ژێر خاکدا خۆت حەشارداوە" لە دروشمەکانی تری خۆپیشاندەران بوون کە لە ناوچە جیاجیاکانی تاران، کەرەج و شیراز شەقامەکانی دەهەژاند.

 

ئاژانسە هەواڵییەکانی ڕژێمی ئێران، ٢٨ی تشرینی یەکەم، هەواڵی گیان لەدەستدانی ئارمیتا گراوندیان بڵاوکردەوە، دوای ئەوەی ٢٧ ڕۆژ لە بێهۆشیدا بوو، بەهۆی ئەوەی لە میترۆیەکدا لەلایەن پۆلیسی ئەخلاقەوە بە بیانووی حیجاب هێرشی دەکرێتە سەر و ئەشکەنجە دەدرێت.

 

هەرچەندە پێشبینی دەکرا تەرمی ئارمیتا بگەڕێندرێتەوە بۆ شاری کرماشان، بەڵام دوای چەند کاتژمێرێک لە ڕاگەیاندنی کۆچی دواییەکەی، بڵاوکرایەوە کە کاتژمێر ٩:٠٠ی بەیانی ئەمڕۆ، ٢٩ی تشرینی یەکەم تەرمەکەی لە شاری بەهەشت زەهرا بە خاک دەسپێردرێت.

 

 

بەرەبەیانی ١ی تشرینی یەکەم، ئارمیتا گراوند، خوێندکاری پۆلی ١١ی ئامادەیی لە قوتابخانەی هانارستان، لە کاتی چوونی بۆ قوتابخانە، لە میترۆدا لەلایەن ئەفسەرێکی ناسراوەوە، بە بیانووی نەپۆشینی حیجاب هێرشی کرایەسەر و کەوتە سەر زەوی و هۆشی لەدەستدا، ڕێکخراوەکانی مافی مرۆڤ و هەندێک لە دەزگاکانی ڕاگەیاندن پشتڕاستیان کردەوە، بە پشتبەستن بە شایەتحاڵەکان، ئارمیتا گراوند لەکاتی کەوتنە سەر زەوی تووشی خوێنبەربوونی مێشک بووە.

 

کاربەدەستانی ئێران لەوان بەڕێوەبەرانی شارەوانی میترۆ و تاران بانگەشەی ئەوە دەکەن، ئارمیتای ١٦ ساڵ بەهۆی دابەزینی فشاری خوێنەوە کەوتووەتە سەر زەوی و لە دۆخی کۆمادایە  و بە بیانووی نەبوونی سی سی ڤی تی لە میترۆکەدا هەموو ڤیدیۆی بەڵگەکانی هێرشکردنە سەر ئارمیتایان سڕییەوە.