ناوەندی هەواڵ

 

ئەمڕۆ ١٣ی ئادار، دەستەی بەڕێوەبەریی كۆمەڵەی ژنانی كوردستان – كەژەكە سەبارەت بە ژەهراویكردنی خوێندكارانی كچ لە ئێران و ڕۆژهەڵاتی كوردستان ڕاگەیەندراوێكی بڵاوكردەوە.

 

ڕاگەیەندراوەکەی کەژەکە بەم شێوەیەیە:

"دوای ئەوەی كچە كورد، ژینا ئەمینی لە ١٦ی ئەیلوولی ٢٠٢٢، لەلایەن دەوڵەتەوە كوژرا، لە ئێران لە سەر بنەمای دروشمی "ژن، ژیان، ئازادی" ڕاپەڕین دەستیپێكرد و هێشتاش بە شێوازی جیاواز و جۆراوجۆر بەردەوامە، لە كوردستان و ڕۆژهەڵاتی ناوەڕاست و هەر چوار قوڕنەی جیهانەوە پشتیوانییەكی گەورە لەم ڕاپەڕینە كرا، پێش هەموو شتێك ئێمە سڵاو و پیرۆزبایی لە ژنان، گەل، بزووتنەوەی ژنان، گەلان، هێزە دیموكراسی و ئازادیخوازەكان، هونەرمەندان، ڕۆشنبیران، گەنجان، سیاسەتمەداران و وەرزشوانان دەكەین، كە بەشدارییان لە ڕاپەڕینی "ژن، ژیان، ئازادی" دا كرد و پشتیوانیان لێكرد، ئێمەش باوەڕمان بەوەیە ئێران، كە لە مێژووی مرۆڤایەتیدا كلتوورێكی قووڵی هەیە، لە پێش هەموو شتێكەوە ئەگەر بتوانێت ژیانێك لەسەر بنەمای ئازادی، دادپەروەری و یەكسانی لە نێوان گەلان دا بئافرێنێت ئەوە كاریگەرییەكی بەهێزی لەسەر كۆمەڵگەكان و ژنان و سەرتاسەری ڕۆژهەڵاتی ناوەڕاست و جیهان دەبێت.

 

دەوڵەتی ئێران سیاسەتی کۆمەڵایەتی لەسەر بنامەی دوژمنایەتی ژنان بونیادناوە

ئەوە لە كاتێكدایە، دەوڵەتی ئێران سیاسەتی كۆمەڵایەتی خۆی لەسەر بنەمای دوژمنایەتی بەرامبەر بە گەلان و ژنان بونیادناوە، لەم سەردەمەدا بە شێوەیەكی دڕندانە و زاڵمانە جێبەجێ دەكات، ئەم كردار و ڕەفتارانە لەگەڵ ڕاپەڕینەكانی ئەم دواییەدا زۆر زیادیان كردووە، بۆ نموونه، سزای لە سێدارەدان، كە دڕندانەترین سزای دژ بە مرۆڤایەتییە، ئێستا لە ئێران بووەتە كارێكی ئاسایی، لەگەڵ ئەوەشدا چەندین كردار و سزای داسەپێنەرانە لە دەرەوەش ژنان دەكاتە ئامانج، گەلان بێ ئیرادە دەكات، زیندانیان دەكات، ئەشكەنجەی قورسیان دەكات، دووریان دەخاتەوە، سزایی داراییان بەسەردا دەسەپێنێت، بێكاریان دەكات و چەندین كرداری هاوشێوە لە دژی ژنان و گەلان ئەنجام دەدرێن، هەركاتێك ناڕەزایەتییەک یان ڕاپەڕینێك هەبێت ئێران ئەوە بە هێزە دەرەكیەكانەوە دەبەستێتەوە، ئەوەش لە كاتێكدایە، كە هۆكاری سەرەكیی سەرهەڵدان لە ئێران، سیاسەتەكانی خودی ئێرانە.

 

سیاسەتی فشار تووڕەیی ژنان زیاتر دەکات

دەوڵەتی ئێران لەو بڕوایەدایە، كە تا چەند بە توندی و ڕەقی بەرامبەر بە ژنان و كۆمەڵگە بجوڵێتەوە، دەتوانێت ئەنجامی گەورەتر بەدەست بهێنێت و سەپاندنی دەسەڵاتی دەوڵەت مسۆگەر دەكات، بەڵام ئەو ڕووداوانە، كە ڕوودەدەن پێچەوانەی ئەوە نیشان دەدەن، سیاسەتەكانی فشار و زۆرداری و چەوساندنەوە، تووڕەیی ژنان و كۆمەڵگە زیاتر دەكات، زیاتریش دەبێتە هۆی ڕاپەڕینیان، هەر ئەوەندە، كە سیاسەتی دوژمنایەتیكردنی بەرامبەر بە گەلان و ژنان زیاتر دەبن، ڕاپەڕینی ژنان و گەلیش ڕوو لە زیادبوون و گەورەتربوون دەكەن.

لەم ڕۆژانەی دواییدا لە ڕاگەیاندنەكاندا بڵاوكرایەوە، هەزاران ژنی گەنج لە خوێندنگەكانی ئێران و كوردستان ژەهراوی بوون و بەلایەنی كەمەوە چوار ژنی گەنج گیانیان لەدەستداوە، ژنان و گەلی كورد باش ئاگاداری ئەوەن، كە چەكی كیمیایی لە مێژوودا چۆن بەكارهاتووە و چ واتایەکی هەیە.

 

هەمیشە لە دژی گەلی کورد گازی کیمیایی بەکارهاتووە

وەك دەزانرێت، دەوڵەتی تورك لە ساڵی ١٩٣٨دا، چەكی كیمیایی لە دێرسیم بەكارهێناوە، ڕژێمی بەعس لە چەندین شار و گونددا لە باشووری كوردستان بەكاری هێناوە، كە قورسترین و جدیترینیان هەڵەبجە بوو و بووە هۆی ئەوە هەزاران كورد كۆمەڵكوژ بكرێن، لەم دواییانەدا دەوڵەتی توركی فاشیست، لە ساڵی ٢٠٢٢ەوە بە پێشێلكردنی هەموو یاسا نێودەوڵەتیەکان و بە ڕەزامەندی و ڕێگەپێدانی ئەو دام و دەزگایانە، چەكی كیمیایی دژی گەریلا لە زاپ و ئاڤاشین بەكاردەهێنێت، دەیان گەریلا بەهۆی ئەو چەكە كیمیاییانەوە لە ئەشكەوتەكان و تونێلەكاندا شەهید بوون, ئێستاش دەوڵەتی ئێران بە هەمان عەقڵییەت و زیهنیەتەوە، بە پلانی فریودەرانە لە دژی هەزاران خوێندکاری کچی بەرێكخستنكراو لە خوێندنگەكاندا، گاز بەكار دەهێنێت و هەزاران خوێندكار، بەهۆی گازەوە ژەهراوی بوون و گواستراونەتەوە بۆ نەخۆشخانەكان، دەوڵەت وەڵامی مامۆستایانی خوێندنگەكان، كە دەیانەوێت ئەو دۆخە ڕوون بکرێتەوە، بە گرتن، لە كار دەركردن و بڕینی موچەکانیان دایەوە، دەوڵەت بە هیچ شێوەیەك لێكۆڵینەوە لە ڕووداوەكان ناكات، ئەوە بە ڕێكکەوت نییە، كە ئەو ڕووداوانە لەم مانگانەی دواییدا لە هەموو خوێندنگەكانی ئێران ڕوودەدەن، لەو دۆخەوە ئەو تێگەیشتنە دروست دەبێت، كە هەر چەندە دەوڵەتی ئێران خۆی لەو ڕووداوانە بە دوور نیشان دەدات و هەندێك تاوانباریش دەستگیر دەكات، بەڵام تەنها دەوڵەتی دەتوانێت بەو شێوەیە پلان بۆ ئەو هێرشانە دابنێت و ئەنجامیان بدات.

ئەوە هەوڵێكە بۆ كۆمەڵكوژی، هەواڵی ئەوە بڵاوبووەتەوە، كە پاسدارانی سەر بە دەوڵەت ئەو ڕووداوانەی ژەهراوی كردنیان ڕێكخستووە، ئەو كردەوانەی ژهراویكردن لەسەر ژنانی گەنج كە لە تاران، كرماشان، تەورێز، سنە، ئەسفەهان و لە خوێندنگە و زانكۆکان دەخوێنن ئەنجامدراون، بە واتایەك دەوڵەت دەڵێت: ئێمە كۆمەڵگە و گەل دەپارێزین، بەڵام ئەگەر بەرامبەرم بوەستنەوە، ڕاپەڕن، ئەو كاتە بە شێوەیەكی جیاواز كۆمەڵكوژی دەكەین.

 

دەوڵەتی ئێران دەیەوێت ژنانی گەنج بترسێنێت و دووریانبخاتەوە

وەك دەزانرێت خوێندکارانی کچ سەرهەڵدانی "ژن، ژیان، ئازادی" یان لە مانگەكانی ڕابردوودا بەڕێوەدە برد، هەربۆیەش دەوڵەتی ئێران، بۆ ئەوەی ژنانی گەنج بترسێنێت ئەوان لە زانكۆكان دووربخاتەوە و لە ماڵدا ڕایانبگرێت، بە مێشكی پیاوسالارانەی فریودەری چەپەڵ ئەو ڕووداوانە ڕێكدەخات و بووەتە هۆی ئەوەی هەزاران ژنی گەنج ڕەوانەی نەخۆشخانە بكرێن، دیكتاتۆری ئێران زۆر لە ئازادی ژن دەترسێت و نیگەرانە لێی، بۆ ئەوەی ژنان زانا نەبن، نەبنە خاوەنی كار، بەرەوپێش نەچن و بەشداری ژیانی كۆمەڵایەتی، دیموكراسی و ئازادی نەبن، پەنا بۆ شێوازێكی دڕندانە، مەترسیدار و نامرۆڤانەی لەم جۆرە دەبات، خۆی لە خۆیدا سیاسەتی سەرەكی و هەنوكەیی ڕژێمی فاشیستی مەلاكان ئەوەیە، كە ژن بەردەوام وەك چینی دووەم بمێنێتەوە و لەسەر ئەو بنەمایە سیاسەت دەكات.

ئەو پەیامە دەگەیەنێت، دەیانەوێت لە كەسایەتی ژنانی گەنجدا بە كۆمەڵگەی بگەیەنن، لە بنەڕەتدا لە ئێران ئایینە جیاجیاكان، گەل، كورد، بەلوچ هەڕەشەیان لێدەكرێت، هەوڵ دەدرێت بێدەنگ بكرێن، هەوڵ دەدرێت سیستمێكی نەوەیی یەكدەست بخوڵقێندرێت و سیاسەتی كۆمەڵایەتی فاشیستیانە هەنوكەیی بسەپێندرێن، لەبەر ئەوە ژنانی گەنج ژەهراوی دەكرێن، لەسێدارە دەدرێن، بە هەزاران كەس دەستگیر دەكرێن و ئەشكەنجە دەدرێن.

 

سەرهەڵدان و بەرخودان لە دژی دەوڵەتی ئێران لە هەموو شوێنێك سەردەكەوێت

هێرشی ژەهراوی بۆ سەر شوێنەكانی ژنانی گەنجی خوێندكار و گرتنی ئەو مامۆستایانەی ئەو ڕووداوانە شەرمەزار دەكەین هەرگیز مایەی قبوڵ كردن نییە، دەبێت دەوڵەتی ئێران دەستبەرداری ئەو سیاسەتە دوژمنكارانەیەی بەرامبەر بە ژنانی گەنج بێت، دەوڵەت دەبێت بە شێوەیەكی یەكسان مامەڵە لەگەڵ گەلاندا بكات و جیاكاری نەكات، ژن، گەل و ئایینە جیاجیاكان چیتر ئەو جیاكاری، نایەكسانی، فشار و ئەشكەنجەیە قەبوڵ ناكەین، كوردستان، ڕۆژهەڵاتی ناوەڕاست، بزوتنەوەكانی ژنان كە لە جیهان تێدەكۆشن، هێزەكانی دیموكراسی و ئازادی هەرگیز قبوڵی ناكەن، تا ئەم سیاسەتە هەنوكەییە بەردەوام بێت، ڕۆحی سەرهەڵدان و هەڵوێستی بەرخودان لە دژی دەوڵەتی ئێران لە هەموو شوێنێك سەردەكەوێت، هەڵبەت نەك هەر مامۆستایان، دەبێت هەموو بەشەكانی كۆمەڵگا ڕووداوەكانی ژەهراویكردن لە بەرامبەر ژنانی گەنج قەبوڵ نەكەن، بەردەوام لە گۆڕەپانەكاندا بن، دەبێت ژنان، گەلەكەمان لەناوخۆیاندا خۆیان بەرێكخستن بكەن و خۆیان بپارێزن.

دوابەدوای ئەم ڕووداوانە بە پێشەنگایەتی ژنان هێزەكانی گەلان و ئازادی و دیموكراسی گۆڕەپانەكان بە توڕەیی و تامەزرۆییەوە زیاتر پڕدەكەنەوە، بەردەوام خۆڕاگری دەكەن و دەكەونە دۆخی سەرهەڵدانەوە، بەم بۆنەوە جارێكیتر ڕایدەگەیەنن، كە وەك بزوتنەوەكانی ژنای كورد شان بە شانی ژنان و گەلانی ئێران و گەلانی كوردستان و بەلوچستان دەبین.

تێكۆشانی ئازادی ژنان، پێكهاتە ئایینیەكان و گەلانی ئێران لە سەر بنەمای فەلسەفەی "ژن، ژیان، ئازادی" هەنگاو دەنێن و لە ڕۆژهەڵاتی ناوەڕاست و جیهان بڵاویدەكەنەوە و سەردەكەون، وەك بزوتنەوەی ژنانی كورد لە هەر شوێنێكی جیهان فشار، ستەم و چەوساندنەوە بوونی هەبێت دژی دەوەستینەوە.

 

هەموو نەورۆزێک سەرەتایەکی نوێیە

پێدەنێینە قۆناغێكی نوێی نەورۆزەوە، هەموو نەورۆزێك بۆ ئێمە سەرەتایەكی نوێی ئازادییە، بەواتای گوڕدان بە تێكۆشان، سەرهەڵدان لە دژی ستەمكار و دیكتاتۆرەكانە، ڕۆژی ژیانەوەیە، دەبێت لە نەورۆزی ٢٠٢٣دا گەلەكەمان ئیرادەی خۆی و ڕەنگی خۆی زۆر بە بەهێزی لە گۆڕەپانەكان بخاتە بەرچاو، لە باكووری كوردستان، ڕۆژهەڵاتی كوردستان، ڕۆژئاوا و باشووری كوردستان و هەموو ئەو جوگرافیایانەی گەلەكەمانی لێیە، دەبێت نەورۆز بە شێوەیەكی شكۆمەندانە پیرۆز بكرێت، دەبێت گۆڕەپانەكانی نەورۆز بگۆرن بۆ ئەو شوێنەی تێیدا ڕۆحی ئازادی و بەرخودان لە لوتكەدایە، لەسەر ئەو بنامەیە ئێمە هەر لە ئێستاوە نەورۆزی ژنان و گەلانمان پیرۆز دەكەین.

لەسەر ئەو بنەمایە جارێكیتر دەڵێین "ژن، ژیان، ئازادیی".