لە کۆی ١٥٨ پێشێلکاری تەنها چوار پێشێلکاری بەرامبەر ژنانی ڕۆژنامەنووس تۆمار کراوە
بەپێی ڕاگەیەندراوێکی سەندیکاى ڕۆژنامەنووسانى کوردستان لە ساڵی ٢٠٢٢دا ١٥٨ ڕۆژنامەنووس پێشێلکارییان بەرامبەر کراوە کە تەنها چواریان ژنن.
ناوەندی هەواڵ
بەپێی ڕاگەیەندراوێکی سەندیکاى ڕۆژنامەنووسانى کوردستان لە ساڵی ٢٠٢٢دا ١٥٨ ڕۆژنامەنووس پێشێلکارییان بەرامبەر کراوە کە تەنها چواریان ژنن، ئەمە لەکاتێکدایە لەناو ژیاندا ژنانی ڕۆژنامەنووس ڕووبەڕووی پێشێلکاری و بێ مافی دەبنەوە لەلایەن شوێنی کار و ئەو کەسانەی ڕوویان تێدەکەن.
ئەمڕۆ سەندیکاى ڕۆژنامەنووسانى کوردستان لە ڕاگەیەندراوێکدا بڵاویکردەوە، ساڵی ڕابردوو ٧٣ پێشێلکاری بەرامبەر ١٥٨ ڕۆژنامەنووس ئەنجامدراوە، لەو ژمارەیە ١٥٤یان لە ڕەگەزى نێرن و چوارى دیکەشیان لە ڕەگەزى مێن.
بەپێی ئامارەکەی سەندیکای ڕۆژنامەنووسان ٤١ لەو ڕۆژنامەنووسانە دەستگیرکراون، ٢٠ حاڵەتیان ڕێگرى و جیاکارى بووە، ١٠ حاڵەتیان سوکایەتى پێکردن بوون، شکاندن و دەستبەسەرداگرتنى پێداویستى ڕۆژنامەنووسى ٧ حاڵەت تۆمارکراوە و ٣ داخستنى نووسینگە و کەناڵەکانى ڕاگەیاندنیش هەبووە.
٢ حاڵەتی هێرش بۆ سەر دەزگاکانى ڕاگەیاندن و دوو حاڵەت دەرکردن لە کار هەبووە، هەر بەپێی ئامارەکە یەک حاڵەتى بریندارکردنى ڕۆژنامەنووس و دوو حاڵەتى برینداربوونى ڕۆژنامەنووس هەبووە.
لەسەر ئاستى پارێزگاکان، هەولێر زۆرترین پێشێلکاری تێدا تۆمارکراوە کە ٢١ حاڵەت بووە، لە پلەی دووەمدا سلێمانی بە ١٨ حاڵەت و دهۆک بە ١٦ حاڵەت دێت، هاوکات لە پارێزگای کەرکوک ١٠ حاڵەتی پێشێلکاری و لە هەڵەبجەش ٣ حاڵەت، لە گەرمیان ٣ حاڵەت، لە سۆران دوو حاڵەتى پێشێلکارى بەرامبەر ڕۆژنامەنووسان ئەنجامدراوە.