سلێمانی

 

سەرچنار ئەحمەد کە لە پەیجی فەرمی خۆی لە تۆڕە کۆمەڵایەتییەکان وێنەی دەستلەکارکێشانەوەکەی بڵاوکردووەتەوە نووسیویەتی: "ئەمڕۆ ٦-١١-٢٠٢٢ پاش تێپەڕبوونی چوار ساڵ بەسەر سوێندخواردنم وەک ئەندامی پەرلەمانی کوردستان لە ٦-١١-٢٠١٨، ئەوەی لەسەرشانم بوو و لەتوانامدابوو جێبەجێم کرد، سوپاس بۆخواو و سوپاس بۆ متمانەی دەنگدەرانم کە منیان کردە نوێنەری خۆیان بۆ ئەوەی بەرگری لە مافەکانیان بکەم لە دەرەوەو ناوەوەی هۆڵی پەرلەمان".

ئاماژەی بەوەشداوە: "ئێستاش کە چوار ساڵ تێپەڕبووە بەسەر ئەو ماوەیە و لەبری ئەوەی ئەمڕۆ ئەندامانی خولی شەشەمی پەرلەمان سوێندی یاسایی بخۆن و کۆتایی بەخولی پێنجەمی پەرلەمان بێت، بەداخەوە پەرلەمان ماوەی تەمەنی خۆی درێژکردەوە و لەسەر حسابی مافی دەنگدەر گەورەترین یاساشکێنی و پێشێلکاری یاسایی ئەنجامداو درێژەی بەو عورفە فەسادەدا کە ئەمە هەشتەمین جارە دووبارەی دەکاتەوە، ئێمەش بۆ پاکڕاگرتنی گەردنی خۆمان بەرامبەر بە خواو خاک و خەڵک، بۆ پاراستنی مافی دەنگدەر کەتەنها بۆ چوار ساڵ متمانەی پێبەخشیوین دەستلەکارکێشانەوەی خۆمان ئاڕاستەی سەرۆکی پەرلەمانی کوردستان کرد".

ئاماژەی بەوەشکردووە کە هیوادارە ببێتە دەستپێک و فشارێکی مەدەنی بۆ سەروەری و ڕێزگرتنی یاسا و کۆتایی هێنان بە یاساشکێنی و حسابکردن بۆ مافی دەنگدەرو ئەنجامدانی هەڵبژاردنەکانی داهاتوو لەکاتی خۆیدا.

دەستلەکارکێشانەوەی سەرچنار ئەحمەد لە کاتێکدایە، کە بەهەمان هۆکار شایان عەسکەری پەرلەنتاری هەرێمی کوردستان لە مانگی ئابی ئەمساڵ دەستلەکارکێشانەوەی پێشکەش کردووە.