لە شاری سنە کۆبوونەوە ناڕەزایەتییەکان دەستیپێکردەوە
خەڵک لە شاری سنە گردبوونەوە و دروشمی دژە حکومەت هاوار دەکەن.
سنە
خەڵک لە شارۆچکەی نانلێی سەر بە شاری سنە بە ناڕەزایەتی دەربڕین بەرامبەر دەستگیرکردنی دوو مامۆستای ئایینی گردبوونەوە و داوای ئازادکردنیان کرد.
خەڵکی ناڕازیی سنە بە تایبەت گەنجانی ناڕازی، دوای نوێژی هەینی لە بەردەم مزگەوتی گەورەی شارۆچکەی نەنلێ کۆبوونەوە و دروشمی دژە حکومەتیان وتەوە و خوازیاری ئازادکردنی ئەو دوو مامۆستا ئاینییە بوون.
مامۆستا لوقمان ئەمینی و مامۆستا ئیبراهیم کەریمی نانلێی، دوو مامۆستای ئایینی شاری سنەن کە لە کاتی ناڕەزایەتییە سەرتاسەرییەکان هاودەنگی خۆیان لەگەڵ خەڵک ڕاگەیاند و سەرکوتی ناڕازییان لەلایەن کۆماری ئیسلامییەوە شەرمەزار کرد.
ئەم دوو مامۆستا ئاینییە لە کاتی گەڕانەوەیان لە مەراسیمی پرسەی مامۆستا یوسف محەمەدی لەلایەن هێزە ئەمنییەکانەوە دەستگیرکران.
مامۆستا یوسف محەمەدی خەڵکی گۆشتخانی و ئیمامی گوندی کەلەتە بوو، کە بە شێوەیەکی دڕندانە لەلایەن پیاوانی سەر بە ڕژێمەوە ئاگر لە ماڵەکەی بەردرا و گیانی لەدەستدا.