ناوەندی هەواڵ

 

مانگرتن و ناڕەزایەتیی خوێندکاران، کرێکاران، مامۆستایان، قوتابیان و سەندیکاکانی دیکە بەردەوامە و ڕاپەڕین کۆماری ئیسلامیی گەیاندووەتە خاڵی کۆتایی.

 

بەپێی ئەو هەواڵانەی کە شەوی ڕابردوو لە زۆربەی شارەکانی کوردستان لەوان سنە، مەهاباد، پیرانشار، سەقز، بوکان، بانە، دیواندەرە، ئیلام، دێهگۆلان، کامیاران و ... بڵاوکراونەتەوە، خۆپیشاندەران ڕژاونەتە شەقامەکان و ڕاپەڕینیان لە ڕێگای داگیرساندنی ئاگر و داخستنی ڕێگاکانەوە بەردەوامی پێداوە.

 

سەرەڕای بەهێزی دۆخی ئەمنی و بڵاوەپێکردنی هێزەکانی سوپای پاسداران و یەکە تایبەتەکان، خۆپیشاندەران لە شار و شارۆچکە و شەقامەکان بەربەستیان دروستکردووە و بنکەی بەسیجی ئەبو دار و پەیکەرێکی بەسیجیان لە گۆڕەپانی ناوەندی شاری ئیلام ئاگر تێبەردا، لەگەڵ هێزە ئەمنییەکان ڕووبەڕوو بوونەتەوە و دروشمەکانی دژی ڕژێمی دیکتاتۆری ئیسلامییان وتووەتەوە، ڕاشگەیاندووە کە شۆڕش بەردەوام دەبێت تا گەیشتن بە ئازادی.

 

هەروەها لە سیستان و بەلوچستان و شارەکانی دیکەی ئێران، لەوانە تاران، مەشهەد، بەندەر عەباس، کرمان، ئەسفەهان، شیراز، ئەهواز، خوزستان، ڕەشت، لاهیجان، مازەندەران و ...، خۆپیشاندەران ڕێگاکانیان داخستووە و دروشم دژی کۆماری ئیسلامی دەڵێنەوە و لەسەر بیناکانەوە وێنەی ژینایان بەرزکردووەتەوە.

 

باس لەوەش کراوە کە هێزە سەرکوتکەرەکان بە تەقەکردن و فڕێدانی گازی فرمێسکڕێژ لە هەوڵی بڵاوەپێکردنی خۆپیشاندەراندا بوون. ئینتەرنێت دەبڕدرێت و ناردنی وێنەی ناڕەزایەتییەکان ڕێگری بۆ دروستدەکرێت، هەروەها زانیارییەکی دروست لەسەر ژمارەی گیانلەدەستدان و بریندار و دەستگیرکردن لە بەردەستدا نییە.