ناوەندی هەواڵ

 

دروشمی "ژن، ژیان، ئازادی"، دروشمێکە کە دوای ڕاپەڕینی سەرتاسەری ئێران لەلایەن زۆرێک لە ژنانی جیهانەوە دووبارە دەبێتەوە و لەگەڵ وتنەوەی ئەو دروشمە قژیان دەبڕن، لە وڵاتی ئیتاڵیاوە ژنان لە تۆڕی کۆمەڵایەتی ئینستاگرام هەڵمەتێکیان بۆ پشتیوانی لە ڕاپەڕینی نەتەوەیی بە پێشەنگایەتی ژنان دەستپێکرد و قژیان دەبڕن، دواتر لە زەرفێکدا دەینێرن بۆ باڵیۆزخانەی ئێران لە ڕۆما.

 

ئەم دەستپێشخەرییە لەلایەن سەرنووسەرانی بەرنامەی LE LENE دەستیپێکرد و زۆرێک لە ئەکتەران، هونەرمەندان، چالاکوانان و ژنانی دیکەش بەشداریان لە کەمپەینەدا کرد و بە کورتکردنەوەی قژیان پشتیوانی لە ژنانی ئێران دەکەن.

 

چەند ڕۆژێک لەمەوبەر لوسیانا لیتیزتۆ لە تۆڕی کۆمەڵایەتی ئینستاگرام بۆ ڕوونکردنەوەی مانای قژبڕین ڕایگەیاندبوو: "قژبڕین ڕێوڕەسمێکی کۆنە کە لە ئێران و وڵاتانی دیکەی دراوسێ بەکاردێت، بە واتای ماتەمینی دێت، کاتێک ڕووبەڕووی خەم و تووڕەیی لەڕادەبەدەر دەبیتەوە، قژت دەبڕیت. وەک ئەوە وایە هەستی جوانیناسی یان جوانیت پشتگوێ بخەیت بۆ ئەوەی نیشان بدەیت کە دڵتەنگیت، ئێستاش ئەمە بووەتە ناڕەزایەتییەکی ڕەمزی دژی دەسەڵاتی ڕژێمی ئێران و حیجابی زۆرەملێ".