ناوەندی هەواڵ

 

ئەمڕۆ، ٢٩ی ئاب، موقتەدا سەدر، ڕێبەری ڕەوتی سەدر دەستبەرداربوونی خۆی لە کاروباری سیاسی ڕاگەیاند و ئەوەی خستەڕوو کە سەرجەم دامەزراوەکانی ڕەوتی سەدر دادەخات، دوای ئەو بڕیارە لایەنگرانی سەدر ڕژانە سەر شەقام و چوونە ناوچەی سەوز و ناو کۆشکی کۆمارییەوە.

 

فەرماندەیی ئۆپەراسیۆنە هاوبەشەکان لە ڕاگەیەندراوێکدا داوای لە لایەنگرانی سەدر کرد بەپەلە ناوچەی سەوز بەجێبهێڵن و جەخت دەکاتەوە بە هەموو جۆرێک ئامادەن و پابەندن بە مامەڵەی برایانە و ئاشتیانە لەگەڵ خۆپیشاندەران.

 

هەروەها ڕاشیگەیاند لە کاتژمێر ٣:٣٠ خولەکی ئەمڕۆوە قەدەغەی هاتووچۆی گشتی لە بەغدا ڕاگەیەندراوە و ئۆتۆمبێل و هاووڵاتییانیش دەگرێتەوە، سەرەڕای ئەو بڕیارە تا ئێستا خۆپیشاندان بەردەوامە.