ناوەندی هەواڵ

 

حسێن کاچماز، بەرپرسی دۆسیەی منداڵان لە فراکسیۆنی هەدەپە لە پەرلەمانی تورکیا، لە کۆنگرەیەکی ڕۆژنامەوانیدا ڕایگەیاند کە بەهۆی هێرشەکانی دەوڵەتی تورکیاوە بۆ سەر ڕۆژئاوای کوردستان منداڵان بوونەتە بەرکەوتە و بەهۆیەوە ٨ منداڵ گیانیان لەدەستداوە و ٢٨ منداڵیش بریندار بوون.

 

بەرپرسەکەی دۆسیەی منداڵان ئەوەشی خستووەتەڕوو کە دوای کۆبوونەوەی نێوان سەرۆکی ئێران و ڕووسیا و تورکیا لە تاران، ئەنقەرە هێرشەکانی بۆ سەر باکوور و ڕۆژهەڵاتی سوریا زیادکردووە، بەشێوەیەکی دوژمنکارانە هێرشەکانی بەردەوام بوون، بە جۆرێک ئاکەپە سیاسەتی دەرەکی خۆی لەسەر توندوتیژی بونیادناوە و بەردەوامی خۆیشی لەو سیاسەتەدا دەبینێت.

 

لەکۆتایدا وتی، هێرشەکان منداڵ، گەنج و خەڵکی مەدەنی دەکاتە ئامانج، بۆیە ئێمە داوا دەکەین ئەو هێرشانە ڕابگیرێن.