ناوەندی هەواڵ

شەوی یەکشەممە سەدان کەس لە خەڵکی تونس لە گەڕەکێکی هەژار لە پایتەخت ناڕەزایەتیان دەربڕی دژی هەژاری و گرانی و کەمی بەشێک لە خۆراکەکان، ئەمەش فشارەکانی بۆ سەر حکومەتی کایس سەعید سەرۆک کۆمار پەرەی سەندووە، لەکاتێکدا ئەو وڵاتە تووشی قەیرانی ئابووری و سیاسی بووە.

 

تونس لە هەوڵدایە بۆ بوژاندنەوەی دارایی گشتی خۆی، لە کاتێکدا ناڕەزایی گەشە دەکات بەهۆی هەڵاوسانەوە بە نزیکەی ٪٩ بەهۆی  کەمی زۆرێک لە ماددە خۆراکیەکان لە فرۆشگاکاندا، چونکە وڵاتەکە توانای پارەدانی لە هاوردەکردندا نییە.

هەروەها نەتەوەی باکووری ئەفریقا لە ناو قەیرانێکی سیاسی تونددایە لەو کاتەوەی ساڵی رابردوو کایس سەعید دەستی بەسەر دەسەڵاتی جێبەجێکردندا گرت و پەرلەمانی هەڵوەشاندەوە لە هەنگاوێکدا کە نەیارەکانی بە کودەتا ناویان دەبرد.

 

لە ناحیەی هەژاری دووار هیچەر لە پایتەخت، بەشێک لە خۆپیشاندەران نانیان بە هەوادا هەڵگرت وەک نیشاندانی هەژاری خەڵکی وڵاتەکە، هەندێکی تریش دروشمی “کایس سەعید لە کوێیە؟” دەوتەوە بۆ نیشاندانی ناڕەزایەتییەکانیان، هەروەها خۆپیشاندەران دروشمی "هەلی کار، ئازادی و کەرامەتی نەتەوەیی" و "ناتوانین پشتگیری لە بەرزبوونەوەی شێتانەی نرخ بکەین" دەوتەوە.

 

کەمیی خۆراک لە تونس خراپتر دەبێت بەهۆی بەتاڵی ڕەفەکانی مارکێت و نانەواخانەکان، ئەمەش ناڕەزایی جەماوەری زیاد دەکات بەهۆی گرانی زۆرێک لە پێداویستییە خۆراکیەکان خەڵکی تونس چەندین کاتژمێر بەسەر دەبەن لە گەڕان بەدوای شەکر و شیر و کەرە و زەیتی چێشتلێنان و برنجدا.

 

لە ڤیدیۆکانی سۆشیال میدیادا دەرکەوتووە کە ڕۆژی یەکشەممە دەیان کڕیار لە بازاڕەکاندا خەریکی بردنەوەی کیلۆیەک شەکرن، تونس کە تووشی خراپترین قەیرانی دارایی بووە، هەوڵدەدات قەرزی سندوقی دراوی نێودەوڵەتی دەستەبەر بکات بۆ ئەوەی دارایی گشتی لە داڕمان ڕزگار بکات.

 

حکومەت بۆ یەکەمجار لە ماوەی ١٢ ساڵدا لەم مانگەدا نرخی غازی چێشتلێنان بە ڕێژەی ٪١٤ بەرزکردەوە، هەروەها ئەمساڵ بۆ چوارەم جار نرخی سووتەمەنی بەرزکردەوە، لە چوارچێوەی پلانێک بۆ کەمکردنەوەی یارمەتییەکانی وزە، کە گۆڕانکارییەکی سیاسەتە کە سندوقی دراوی نێودەوڵەتی داوای دەکات.