لەناو دادگادا لە جیاتی پاراستنی مافی ژنان، لە ژن دەدرێت
دوێنێ دوای ئەوەی دادگاییکردنی کەیسی کوشتنی تارقی بەقاڵ کۆتاییهات، خوشکەکانی ئەو کوژراوە ناڕەزایەتییان دەربڕی و لە دادگادا لەلایەن پۆلیسەوە هێرشکرایە سەریان، لەسەر ڕووداوەکە ژنان دەڵێن: ئەگەر لە دادگا لە ژن بدرێت، ئیتر ژنان بۆ مافەکانیان ڕووبکەنە کوێ.
ناوەندی هەواڵ
دوێنێ لە دادگای سلێمانی دوای تەواوبوونی دانیشتنی دادگا لەسەر کەیسی کوشتنی تارقی بەقاڵ، خوشکەکانی ئەو کوژراوە ناڕەزایەتییان لەسەر بڕیارەکەی دادگا دەربڕی و لەلایەن هێزە ئەمنییەکانەوە هێرشکرایە سەریان و لە خوشکەکانی تارقی بەقاڵ درا.
بڵاوبوونەوەی ڤیدیۆی هێرشکردنە سەر ژنان کاردانەوەی گەورەی لەناو خەڵکدا لێکەوتەوە و ئاماژەیان بەوەدا کە هێزە ئەمنییەکان لە بری پاراستنی گیانی هاوڵاتیان، خۆیان هێرش دەکەنە سەر هاوڵاتی و بەبیریشیان هێنایەوە کە لەماوەی ڕابردوودا هێزە ئەمنییەکان بە شەق کەوتوونەتە گیانی مامۆستایانی ناڕازی و شەقیان لە سەری خوێندکار داوە.
لە کاتی گرژییەکەدا خوشکەکانی تارقی بەقاڵ بڕیاری ڕاگرتنیان بۆ دەرچوو، یەکێک لە خوشکەکانی لە کۆنگرەیەکی ڕۆژنامەوانیدا ڕایگەیاند، "دوای ئەوەی دادگا ماددەی یاسایی ئەو کەسەی کە ئۆتۆمبێلەکەی تاریقی بەقاڵی بردووە کە ناوی ڕەعدە لە ٤٠٦وە گۆڕی بۆ ٤٦٠ ئێمە ناڕەزاییامن دەربڕی بەڵام لەلایەن هێزە ئەمنیەکانەوە هێرشمان کرایە سەر و دایک و خوشکەکانیشم ڕاگیراون"، دوای چەند کاتژمێرێکیش دایک و خوشکەکان ئازاد کران.
"حزب چۆن کادرەکانی پەروەردە دەکات!"
تۆڕە کۆمەڵایەتییەکان بە بڵاوکردنەوەی ڤیدیۆ و بەرپرسیارێتی خستنەسەر شانی حکومەت و دەسەڵات تەنرا، ئەڤین ئەحمەد، ڕۆژنامەنووس بڵاویکردەوە، "له‌و بڕوایه‌دا نیم هیچ میلله‌تێك هێنده‌ى كورد مێژووى تاڵى له‌گه‌ل شه‌قاوه‌یى و شه‌ق وه‌شێنیدا هه‌بووبێت...بیرتانه به‌عس و دار و ده‌سته‌كه‌ى چۆن شه‌قیان له دایك و خوشكى كورد هه‌ڵده‌دا، ته‌نها له‌به‌رئه‌وه‌ى بوێربوون و سه‌ریان بۆ سته‌م و بێڕه‌وشتى سیستمه باڵاده‌سته‌كه‌ى ئه‌و سه‌رده‌مانه شۆڕ نه‌ده‌كرد؟.. مخابن كورد نه‌ك هه‌ر ده‌رسى له‌و مێژووه وه‌رنه‌گرت به‌ڵكو، هێشتا پۆستاڵ له پێیه‌كانى كورد به‌ئه‌قڵیه‌تى پۆستاڵ له‌پێكانى سه‌رده‌مى به‌عس لێده‌خۆڕن و مێژووى پڕ له شه‌رمه‌زارى دووباره ده‌كه‌نه‌وه، ئه‌وه‌ى له‌ناو دادگاى سلێمانى به‌رامبه‌ر به ژنێك ڕوویدا ئه‌وپه‌ڕى شه‌رمه‌زارییه بۆ هێزه ئه‌منیەکان، هاوكات شێوازى حوكمڕانى یه‌كێتیش له‌م ده‌ڤه‌ره ده‌خاته ژێر پرسیاره‌وه ئاخۆ حزبى كوردى چۆن كادیره‌كانى به‌خێو و په‌روه‌رده ده‌كات!".
"ئەمە ڕەفتاری خەڵکی شەقوەشێنە"
چۆمان هەردی، مامۆستای زانکۆ و فێمینیست، بڵاویکردووەتەوە، "ئەمە ڕەفتاری پۆلیس نییە لەگەڵ خەڵکی مەدەنی کە هاتوون بۆ دادگا تا مافیان پارێزراو بێت، بەڵکو ڕەفتاری خەڵکی شەقوەشێن و توندوتیژە کە بە هیچ جۆرێک نابێت لە دامودەزگا فەرمییەکانی هەرێمدا جێیان بێتەوە. بەڵام کاتێک هەستیارترین دەزگاکانی هەرێم کە دەبێت پارێزەری نیشتیمان و هاوڵاتیان بن بێ فلتەر و چاودێری و ڕاهێنان، بە ئاسانی هەر کەسێک وەردەگرن، ئیتر ئەمەی لێدەردەچێت. بەداخەوە بۆ ئەم خانمانەی دەکەونە بەر شاڵاوی ئەم پیاوە، هێزەکانی ئاسایش، پۆلیس و پێشمەرگە پێویستیان بە فلتەری باشتر، چاودێری زیاتر و ڕاهێنان و پەروەردەکردنی بەردەوام هەیە تا پاک ببنەوە لەمجۆرە ڕەفتارە".
"شکۆی مرۆڤ لە دادگادا دەشکێنرێت"
بەهار مونزیر، چالاکوان، لەسەر هەمان بابەت بڵاویکردووەتەوە، "شەق هەڵدان لە ژنێك لەناو دادگای سلێمانی، ئەم وێنەیە لە لایەن هاوڕێم پارێزەر شۆخان ئەحمەدەوە وەرمگرتووە. شکۆی مرۆڤ لە دادگادا دەشکێنرێت نەك تەنها لەناو ماڵدا، لەسەر جادە، لە شوێنی کار و ناو حزب و میدیاکان و سۆشیال میدیا و ناو کۆبونەوەکان. شکۆی ژن دەشکێندرێت لەبەر لاوازی پلەی کۆمەڵایەتی، یاسایی و ئابورییەکەی".
ڕێزان شێخ دلێر، پەرلەمانتاری خولی پێشووی پەرلەمانی عێراق لەژێر ناوی "جەرگت دەسووتێنن و دەنگیش هەڵبڕی بەر شەقت دەدەن!" لە فەیسبووکی فەرمی خۆی دەنووسێت، چـارەنووسی ژن بوون لەوڵاتی ئێمە!، "دوای چـەندین خول و ۆڕک شۆپ و باشترین پاڵپشتی، هێشتا زۆرێک لە ئەندامانی هێزە ئەمنیەکـانی فێری هەڵسوکـەوتکردن نین لەنێو فەرمانگە و دامەزراوەکـاندا، بەداخـەوە ئەوەی لە دادگـای سلێمانی ڕوویدا وەک چۆن هەموو ویژدان زیندوویەکی شۆک کرد دەبوو بەو شێوەیەش دادگـا و بەرپرسانی هێرەئەمنیەکان بەهۆش بهێنایە بەوەی لەوەبگـەن چ ئیدارەیەک ئیدارەی ئەم فەرمانگـانە دەدەن، دەبوو جەنابی دادوەر و بەرپرسانی ئەو هێزە ئەمنییە پێش تەدەخوولی کاک قوباد ڕێکاری شایستەی ئەو کارە قێزەوەنەیان بگرتایەتە بەر، گـەر ئەو ژنـانە تاوانیشیان کردبێت کە خۆیان قوربانین، دەبوو زۆر لەوە زیاتر بە دڵ فراوانی جەنابی دادوەر مامەڵەی بکردایە، نـەک کۆمەڵێک ژن و کچی قوربانی بخاتە بەردەم چەند کەسێکی ناحاڵی لە پیشەکەی خۆشیان، سەیرێکی دادوەری ئەمریکی فرانک کابیرۆ بکـەن لێوە فێربن چۆن مامەڵە دەکــەن لەگەڵ دۆخێکی لەو جۆرە!.
لێــرەوە ئیتر کاتی ئەوەیە بڵێین، فەرموون ئەمە دەرئەنجامی بێ باکیتانە لە هەموو وردەکاریەکی ئەم شاری هەڵمەت و قوربانی، پایتەختی ڕۆشنبیری و سەرقاڵیتانـە بە بەرژەوەندی تەسکی کەسی".
ئەمانە و چەندین ناڕەزایەتی و ڕەخنەی دیکە لە حکومەت و سیستمی دەسەڵات گیرا لەلایەن توێژە جیاوازەکانی کۆمەڵگەوە.
لەلایەکی دیکەوە نوسینگەی قوباد تاڵەبانی، جێگری سەرۆکی حکومەتی هەرێمی کوردستان ڕایگەیاند ڕێکاری یاسایی دەگرنە بەر، سەرۆكایەتی دادگای تێهەڵچونەوەی سلێمانی لە جیاتی دڵنیایدان بە هاوڵاتیان کە دەتوانن لە دادگادا مافەکانیان پارێزراو بێت، دوای ڕووداوەکە ڕاگەیەندراوێکی بڵاوکردەوە و ئاماژەی بەوەدا کە كەسوكاری تارقی بەقاڵ لە هەموو دانیشتنێكی دادگادا پشێوییان ناوەتەوە و سوكایەتی و بێڕێزی زۆریان بە دادوەران و پۆلیس كردووە، ئەو حاڵەتی لێدانەش كە لە گرتە ڤیدیۆكەدا دەركەوتووە رەفتارێكی كەسییە.
تاریق رۆستەم، ناسراو بە تاریقی بەقاڵ،کە باوکی جوار منداڵ بوو، رۆژی ١٨-١٢-٢٠١٨ بەخۆی ئۆتۆمبێلەکەیەوە بێسەروشوێن بوو. دوای چوار مانگ هێزەئەمنییەکانی سلێمانی، باندێکی سێ کەسی دزی و کوشتنیان دەستگیرکرد و رایانگەیاند، ئەو باندە دەستیان لە کوشتنی تاریقی بەقاڵدا هەبووە.