سلێمانی

 

پێش نیوەڕۆی ئەمڕۆ، لە بارەگای شاری سلێمانیی ڕێکخراوی جیهانیی مافی مرۆڤی ویلایەتە یەکگرتووەکانی ئەمریکا لە هەرێمی کوردستان، سیمینارێک بە دروشمی " یاسای باری کەسی بەرەو کوێ؟" بۆ چالاکوانی مافی مەدەنی و پارێزەر ڕازاو گوڵی ڕێکخرا.

 

ڕازاو مەحمود گوڵی، خاوەنی بڕوانامەی دکتۆرا لە یاسای باری کەسێتی و چالاکوانی مافەکانی ژنان، لە سیمینارەکەدا باسی لەوەکرد، هەموواری یاسای باری کەسێتی ژمارە ١٨٨ی ساڵی ١٩٥٩ی عێراقی و دەستبردن بۆ ئەو یاسایە کاریگەری مەترسیدار لەسەر کۆمەڵگەی عێراق و هەرێمی کوردستان بەجێ دەهێڵێت، دەشڵێت: هەموواری یاساکە کاریگەری لەسەر کۆمەڵگە جێ دەهێڵێت، منداڵ لە پێش لە دایکبوونیەوە تا ئەو کاتەی گەورە دەبێت و پاش کۆتای هاتن بە ژیانیشی کاریگەری میرات کە پەیوەندی بە مرۆڤەکانەوە هەیە، بەم یاسایە دەگۆڕێت، دەرئەنجامی یاسای باری کەسێتی دابەشبوونی کۆمەڵگەی عێراقی لێ دەکەوێتەوە، بە یاسایکردنی سەندنەوەی مافی دایکایەتی و هاوسەرگیری پێکردنی منداڵانە، ڕێگە خۆشکەریشە بۆ ئەنجامدانی هاوسەرگیری لە دەرەوەی دادگاکان، پاشان بە هەموواری یاساکە ڕۆڵی دادگاکان بەرەو نەمان دەبات.

 

لە درێژەی سیمینارەکەدا، ئاماژەی بەوەشدا، دروستبوونی هاوپەیمانییەک لەسەر ئاستی عێراق و هەرێمی کوردستان، بە ناوی هاوپەیمانی ١٨٨ گرنگە، پێویستە هاوپەیمانیەکە دژ بە هەموواری یاسای باری کەسێتی عێراقی بووەستێتەوە، وتیشی: سەرەتای هەموواری یاساکە بەشێک لە چالاکوانان هەوڵی ئەوەیاندا خوێندنەوە بۆ یاساکە نەکرێت، بەڵام خوێندنەوەی یەکەم و دووەمی بۆ کرا و هەوڵەکانمان سەری نەگرت، شیعەکان لە هەوڵی ئەوەدان خوێندنەوەی سێهەمی بۆ بکرێت و بچێتە دەنگدانەوە، مەترسییەکەش ئەوەیە شیعەکان زۆرینەی پەرلەمانی عێراق پێک دەهێنن و پاشان لەگەڵ سوننەکاندا ڕێکەوتنیان بۆ هەموواری یاسای باری کەسی ئەنجام داوە.

 

"لە ڕێگەی سیمینار و چالاکی مەدەنییەوە ژنان لە یاساکە هۆشیار دەکەینەوە"

چیا عەبدولقادر، دەستەی کارگێڕی ڕێکخراوی شاد و چالاکوانی مافی ژنان، دەڵێت: هەمووارکردنی یاساکان کێشەی کۆمەڵایەتی بۆ ژنان و منداڵان دەهێنێتە کایەوە، هەبوونی جۆرەها سیمینار لە بارەی یاسای باری کەسێتییەوە لەلایەن پارێزەران و چالاکوانانەوە کارێکی گرنگە، ئێمە دەتوانین ژنان بەردەوام هۆشیار بکەینەوە، لە ڕێگەی یەک بوون و یەک ڕیزی ژنانەوە دەتواندرێت بەر بە یاساکان دژ بە ژنان و منداڵان بگیرێت، وەک دایکێک کە خاوەن منداڵێکی تەمەن ٩ ساڵم، ڕێگە نادەم منداڵەکەم ڕووبەڕووی کێشە کۆمەڵایەتی و یاساییەکەکان ببێتەوە بەهۆی ئەنجامدانی هاوسەرگیرییەوە.

 

ئەو چالاکوانە لە کۆتاییدا وتی: ئەندام پەرلەمانان ئەرکیان دابینکردنی مافی هاوڵاتیانە لە پەرلەمانی عێراقدا، لە ڕێگەی خوێندنەوەی جارێکی دیکە بۆ یاسای باری کەسێتی زیان بە کۆمەڵگە و لە ناویاندا ژنان و منداڵان دەگەیەنێت، پێویستە ڕێگە بگیرێت لە هەمووارکردنەوەی یاساکە.