ناوەندی هەواڵ

 

دەوڵەتی تورک لە ١٥ی حوزەیرانەوە هێزەکانی لە باشووری کوردستان و نزیک لە سنووری پارێزگای دهۆک زیاد کردووە و کەرەستە و چەکی سەربازی هێناوەتە ناوچەکە، لەگەڵ ئەوەشدا بۆردوومانەکان بەردەوامن و بەهۆیەوە ڕەز و باخی هاوڵاتیان سووتاوە.

 

لە بەرامبەر ئەم کارانە، حکومەتی هەرێم و حکومەتی عێراق بە لێدوانەکانیان ڕەوایەتی بەم داگیرکارییە دەدەن و لە خەمی هاوڵاتیاندا نین.

 

بە گوێرەی بەرگریی شارستانیی دهۆک، بەهۆی بۆردوومانەکانی تورکیاوە، زیاتر لە ٢٥ هەزار دۆنم دارستان، پووش و پاوانی خەڵک سووتاوە. 

 

ڕێژەی سووتانەکە بە هۆی بەردەوامی بۆردوومانەکانەوە ڕۆژ بە ڕۆژ لە زیادبووندایە و لەسەر ڕێگەی ئامێدی- دێرەلووک ٤٠ دۆنم زەوی کە بەشێکیان ڕەز و باخی هاونیشتمانییان بوون، لە یەک ڕۆژدا سووتان.

 

 

سووتانی ڕەز و باخی هاوڵاتیان کە بەشێکیان ترێ بوون، بەرهەمی بەشێکی جوتیارانی ئەو ناوچەیەکی لەناو برد، لە کاتێکدا جوتیاران چاوەڕێی چنینەوەی بەرووبوومەکانیان بوون.